Astanada geroın saqtaǵan er adam 11 jylǵa sottaldy
ASTANA. QazAqparat - Astanada sot 11 kılogramm geroındy satý maqsatynda saqtaǵan er adamdy 11 jylǵa sottady, dep habarlaıdy QazAqparat elorda sotynyń baspasóz qyzmetine silteme jasap.
Polıtsııa qyzmetkerleri Astana kósheleriniń birinen Lexus GS 300 markaly avtokóligin toqtatty. Kólikti tekserý barysynda júrgizýshi oryndyǵynyń astynan polıetılenge oralǵan 375,35 gramm salmaqtaǵy geroın tabyldy. Odan keıin azamattyń turǵylyqty jerin tekserý kezinde de satý maqsatynda saqtalǵan jalpy salmaǵy 10,838 kılogramm geroın tárkilendi.
Astana qalasynyń qylmystyq ister jónindegi aýdanaralyq mamandandyrylǵan soty er azamatty kináli dep tanyp, 11 jyl bas bostandyǵynan aıyrdy. Úkim zańdyq kúshine endi.
