Astanada gazdy qaıta jabdyqtaý stansasy ashyldy
ASTANA. QazAqparat - Astanada "Turan" suıyq gazdy qaıta jabdyqtaý stansasy ashyldy. Stansanyń alǵashqy tutynýshysy Nazarbaev Ýnıversıteti bolmaq, dep xabarlaıdy QazAqparat.
Gazdy jetkizýshi kompanııa «Gazprom transgaz Ekaterınbýrg» bolady.
Gazben qamtamasyz etý kózi LNG ınnovatsııalyq texnologııalarynyń bazasynda jasaldy jáne dızel men kómirge qaraǵanda, aýaǵa zııandy qaldyqtardy 70-90% paıyzǵa taratady.
"Bul stansa reseılik ınvestorlardyń qarajatyna salyndy. Barlyq jobalar sátti júzege asyp, Astanada ekologııa men aýaǵa taraıtyn qaldyqtardyń kólemin azaıtamyz degen úmittemin", - dedi stansanyń ashylý saltanatynda Astana ákimi Áset Isekeshev.
«Gazprom transgaz Ekaterınbýrg» kompanııasy basshysynyń orynbasary Sergeı Lıhovskıhtiń sózinshe, bıylǵy jylǵa 5 myń tonna metan jetkizý kózdelgen.
"Aldaǵy jospar boıynsha, "Gazprom eksportpen" birge, memorandým boıynsha 2021 jylǵa qaraı 320 myń tonna kólemine deıin jetkizýimiz shart. Bul kólem Astanany jáne Qazaqstannyń keıbir soltústik aımaqtaryn gazben qamtýǵa jetedi", - deıdi Global Gas Regazification kompanııasynyń dırektory Panaet Saýlıdı.
Qazirgi kezeńde jobaǵa 2 mlrd teńge jumsalǵan. 2021 jylǵa deıin qarastyrylǵan ınvestıtsııanyń jalpy kólemi 20 mlrd teńgeni quraıdy.
Keshenniń qýaty saǵatyna 25 Gkal-ǵa shaqtalǵan. Bul óz kezeginde jarty mıllıon sharshy metr ǵımarat pen baspanany jylýmen qamtýǵa jetedi.
