Astanada gaz ballony jarylyp, er adam men eki bala aýrýhanaǵa jetkizildi
«5 tamyz kúni saǵat 16:25-te «QazTransGaz Aımaq» AQ apattyq dıspetcherlik qyzmetine úsh adamnyń gaz jarylysynan zardap shekkeni týraly habarlama keldi. Oqıǵa Astana qalasynyń «Nurly jol» vokzalynyń mańyndaǵy shaǵynaýdanda bolǵan. Jedel jetken apattyq-dıspetcherlik brıgadanyń málimetinshe, jeke turǵyn úıde bolǵan gaz jarylysyna propan gaz ballony sebepker bolǵan», - dep jazylǵan QazTransGaz Aımaq habarlamasynda.
Jarylystan zardap shekken 1995 jylǵy er adam men onyń 7 jáne 2 jasar balalary qala aýrýhanasyna jatqyzyldy.
Uıymnyń habarlaýynsha, gaz ballony redýktorynyń shlangpen jalǵanatyn jerinde aqaý bolǵan. Sol jaryqshaqtan shyqqan gaz propan ballony turǵan oryn men oǵan japsarlas jýynatyn bólmede jınalyp qalǵan. Keıin jýynatyn bólmege kirip jaryq jaqqandaǵy ushqynnan gaz jarylysy oryn alǵan.
Úıdiń ózi tabıǵı gazǵa qosylǵanymen, jarylys kezinde tabıǵı gaz óshirilip turǵan. Úı ıeleri tabıǵı gazdy tek jylytý maýsymynda ǵana qoldanǵan. Qalǵan kezde gaz ballondaryn qoldanyp kelgen.
Oqıǵa bolǵan kottedj úı kishigirim toı-tomalaq ótkizý úshin jalǵa berilip kelgen. Bul úıde gaz dabylqaqqyshtary ornatylǵan, biraq ol iske qosylmaǵan.
«Oqıǵa ornyna TJD, ýchaskelik polıtsııa qyzmetkerleri, úıishilik gaz jabdyqtaryna qyzmet kórsetý kompanııasynyń ókili men úı ıesi shaqyryldy. Qazirgi ýaqytta jaǵdaıdyń sebepteri anyqtalýda. Bul rette «QazTransGaz Aımaq» AQ úıishilik gaz jabdyqtaryna tehnıkalyq qyzmet kórsetpeıtinin atap ótemiz. Gazdy paıdalaný erejelerin saqtańyzdar», - deıdi «QazTransGaz Aımaq» AQ.
