Astanada garajdan bastalǵan órt qonaqúıdiń shatyryna deıin taraǵan

ASTANA. KAZINFORM — Elordanyń Saryarqa aýdanynda Beketaı kóshesindegi ǵımarattardyń biri órtenip jatyr. Qazir jedel shtab ashylyp, 2 órt sóndirý ýchaskesi uıymdastyryldy, dep habarlaıdy vedomstvonyń baspasóz qyzmeti.

Órt sóndirýshiler kelgen kezde eki qabatty ǵımarattyń birinshi qabatyndaǵy garajda eki avtokólik janyp jatqany anyqtaldy. Ot janynda ornalasqan tórt qabatty qonaqúıdiń shatyryna deıin taraǵan.

— Jergilikti jerde jedel shtab ashylyp, 2 órt sóndirý ýchaskesi uıymdastyryldy. Oqpandar engizildi, sýdyń úzdiksiz berilýi qamtamasyz etildi. Janý oshaqtaryna qol jetkizý jáne ottyń odan ári taralýyn boldyrmaý úshin ǵımarattyń shatyry ashylady. Oqıǵa ornynda qutqarýshylar joǵary dárejemen jumys jasap jatyr. Zardap shekkender týraly aqparat túsken joq, — delingen habarlamada.

Qazir 150 sharshy metr alańdy sharpyǵan órt sóndirildi. Degenmen shatyr konstrýktsııalaryn sýytý jáne bólshekteý jumystary jalǵasyp jatyr.

Budan buryn Almatyda dúken órtenip, 5 adamǵa medıtsınalyq kómek qajet bolǵanyn jazǵan edik.