Astanada Ǵ.Jubanova atyndaǵy shekti aspaptar kvarteti óner kórsetedi
ASTANA. 28 qyrkúıek. QazAqparat - 29 qyrkúıekte Astanadaǵy Qazaq ulttyq óner ýnıversıtetiniń organ zalynda Ǵ.Jubanova atyndaǵy «GRAND CLASSIC» QR memlekettik shekti aspaptar kvartetiniń kontserti ótedi.
Bul týraly Astana memlekettik fılarmonııasynyń baspasóz qyzmeti habarlady.
«Daryn» jastar syılyǵynyń laýreaty, Italııada. Frantsııada, Japonııada, Germanııada, Reseıde, Ýkraınada jáne Qazaqstanda ótken halyqaralyq konkýrstardyń laýreaty atanǵan kvartet mýzykanttary - «Bolashaq» baǵdarlamasynyń stıpendıattary. Olar bıylǵy jyly Bazel mýzyka akademııasynda professor Raıner Shmıdttiń táliminen ótti. Bul Qazaqstandaǵy kvartettik mýzykanyń alǵashqy halyqaralyq dıplomy. Aǵymdaǵy jyly kvartet shveıtsarııalyq «Divox» dybys jazý kompanııasymen uzaqmerzimdi kelisim-shart jasasty.
Kontsert baǵdarlamasynda Shýberttiń «Aıaqtalmaǵan kontsert», A.Veberıdiń "Langsammer Satz», A.Jeldibaevtyń «Erke sylqym», F.Mendelsonnyń "Kvartet a-moll, or.13» shyǵarmalary oryndalmaq. Onyń quramynda Ernar Myńtaev (vıolenchel, kórkemdik jetekshisi), Aıdar Toqtalıev «(birinshi skrıpka), Alekseı Lebedev (ekinshi skrıpka), Aıbek Áshirmatov (alt) sııaqty ónerpaz jastar bar.
Ǵ.Jubanova atyndaǵy shekti aspaptar memlekettik kvarteti 1988 jyly Ahmet Jubanov atyndaǵy Almaty mýzyka mektebinde qurylǵan bolatyn. 1997 jyly shekti aspaptar kvartetin QR Memlekettik syılyǵynyń laýreaty, kompozıtor, QR Parlamenti Senatynyń depýtaty Tólegen Muhamedjanov Astana qalasynyń memlekettik fılarmonııasyna shaqyrǵan edi.
