Astanada G-Park kompanııasyna jańa qurylys bastaýǵa tyıym salyndy

Astana ákimdigi G-Park kompanııasyna 12 nysandy aıaqtap, úleskerlerge kilt tapsyrǵansha jańa qurylys bastaýǵa tyıym saldy. Bul týraly Astana qalasynyń ákimi Jeńis Qasymbek aıtyp berdi, dep habarlaıdy Kazinform.

«Búgingi tańda G-Park qalada 12 nysannyń qurylysymen aınalysýda. Shynynda da, bıyl kompanııada ártúrli máseleler boldy. Biraq árbir turǵyn úı boıynsha Astana ákimdigi bul máseleni erekshe baqylaýda ustap otyr. Bul jaǵdaıdy óte jaqsy bilemiz. G-Park kompanııasy mindetti túrde osy 12 nysandy aıaqtap, úleskerlerge kilt tapsyrady», - dep túsindirdi ákim Ortalyq kommýnıkatsııalar qyzmetinde ótken baspasóz máslıhatynda.

Onyń aıtýynsha, kompanııa osy 12 nysandy aıaqtap, kilt tapsyrǵansha jańa nysandardy salýǵa tyıym salynǵan.

Eske salsaq, bıyl sáýirde jerdi rásimdeýdegi zańsyz áreketi úshin «G-Park» kompanııasyna tıesili «Dýblın» jáne «Vashıngton» turǵyn úı keshenderi súriletinin jazyp edik.

Keıin «Vashıngton» turǵyn úıi súrilmeıtin boldy, qurylys kompanııasyna jiberilgen aqaýlardy joıyp, barlyq qajetti ruqsat qujattaryn rásimdeý tapsyryldy.