Astanada G-Park kompanııasy qujatsyz turǵyn úıler sala bastady – Úkimet basshysy

ASTANA. KAZINFORM – Úkimet basshysy Oljas Bektenov qurylysy problemaǵa aınalǵan turǵyn úıler máselesin kóterdi.

«Birqatar óńirde normatıvtik talaptardyń buzylýynan problemalyq obektiler jyldar boıy aıaqtalmaı keledi. Olardyń qataryna taǵy da qurylys nysandary qosylýy múmkin. Búginde elimizde 39 qurylysy bitpegen problemalyq obekt bar. Mysaly, Aqtóbe oblysynda 11 obekti boıynsha aldanǵan úleskerler 2 jyldan beri sottasyp keledi», - dedi Oljas Bektenov Úkimet otyrysynda. 

Premer-Mınıstr elordadaǵy qurylysy uzaqqa sozylǵan turǵyn úılerge jeke toqtaldy. 

«Astanadaǵy «Arabı-2 – Granıtnyı-2» turǵyn úı kesheni 10 jyl buryn problemalyq nysan dep tanylǵan. Qazir 200-ge jýyq otbasy úılerin ala almaı otyr. Qujattary durys emes kóptegen obektilerdiń qurylys jumystary sozylyp ketýi múmkin. Elordada G-Park kompanııasy ruqsat qujattaryn almastan 7 turǵyn úı qurylysyn júrgizip jatyr. Al oǵan 3,5 myńǵa jýyq otbasy óz qarajatyn salǵan», - deıdi ol. 

Eske sala ketsek, Astana ákimdigi G-Park kompanııasyna 12 nysandy aıaqtap, úleskerlerge kilt tapsyrǵansha jańa qurylys bastaýǵa tyıym salǵan edi.