Astanada fýtboldan «Kóktem-Kúz 2015» ulttyq stýdenttik lıga oıyndary ashylady
ASTANA. QazAqparat - Búgin, 18 sáýirde Nazarbaev Ýnıversıtetiniń sport ortalyǵynda Qazaqstan Respýblıkasy Bilim jáne ǵylym mınıstri Aslan Sárinjipovtiń qatysýymen «Kóktem-Kúz 2015» fýtboldan Ulttyq stýdenttik lıga oıyndarynyń saltanatty ashylý rásimi ótedi.
2014 jyly fýtboldan Ulttyq stýdenttik lıgaǵa Astana jáne Almaty qalalarynyń joǵary oqý oryndarynyń komandalary qatyssa, bıyl fýtboldan stýdentterdiń ulttyq lıgasy Qaraǵandy jáne Shymkent qalalarynyń joǵary oqý oryndarynyń komandalarymen tolyqty.
Atalǵan týrnırge Nazarbaev Ýnıversıtetiniń, L.Gýmılev atyndaǵy Eýrazııa Ulttyq ýnıversıtetiniń, S.Seıfýllın atyndaǵy Qazaq agrotehnıkalyq ýnıversıtetiniń, Qazaq gýmanıtarlyq zań ýnıversıtetiniń, Turan-Astana ýnıversıtetiniń jáne Qarjy akademııasynyń komandalary qatysady. Odan ári Stýdentterdiń ulttyq lıgasynyń kóktemgi týrnıri Qaraǵandy qalasynda ótkizilip, Shymkent qalasynda aıaqtalady, dep habarlaıdy QR Bilim jáne ǵylym mınıstrliginiń baspasóz qyzmetinen.
Ótken jyly Qazaqstan Respýblıkasy Bilim jáne ǵylym mınıstrligi men QR Fýtbol federatsııasy arasynda bilim berý uıymdarynda fýtboldy damytý jónindegi ózara memorandým jasaldy.
