Astanada fýtboldan Qazaqstan premer-lıgasynyń jeńimpazdaryna qurmet kórsetildi
ASTANA. QazAqparat - Qazaqstan Fýtbol federatsııasynyń Prezıdenti Ádilbek Jaqsybekov «Astana» FK fýtbolshylary men jattyqtyrýshylar shtabyna altyn medaldar tabys etti, dep habarlady astana.gov.kz.
«Astana» komandasy osy kúnge deıin óziniń az ǵana tarıhynda eki márte Qazaqstan kýbogyna, Sýperkýbok pen kúmis júldege qol jetkizgen bolatyn. Biraq búkil ataqtyń ishinde chempıon ǵana joq edi. 2014 jyly jas klýb bul shyńdy da baǵyndyrdy. Stanımır Stoılovtyń tárbıelenýshileri jeńiske degen yntasy men sheberlikterin kórsetti. Olar basty qarsylasy - «Qaırat» komandasyn chempıonattyń aıaqtalýyna bir týr qalǵanda jeńdi. Ótken jyly elordalyq komanda Memleket basshysy N.Á.Nazarbaevtyń bastamasymen qurylǵan «Astana» prezıdenttik kásiptik sport klýbynyń bir bóligine aınaldy. Sonymen qatar, bıyl «Astana» ÝEFA Eýropa lıgasynda da laıyqty óner kórsetti. Armenııanyń «Pıýnık», shvetsııalyq AIK jáne Ispanııanyń «Vılıarreal» komandalarymen keremet oıyn kórsetip, jankúıerlerin qýantty. - Qazaqstan Fýtbol federatsııasynyń jáne fýtbol qoǵamynyń atynan «Astana» fýtbol klýbyn fýtboldan Qazaqstan Respýblıkasy chempıonatynyń 2014 jylǵy maýsymynda merziminen buryn jeńiske jetýimen quttyqtaımyn!, - dedi QFF Prezıdenti Ádilbek Jaqsybekov.
Bul tabandy kúres nátıjesinde qol jetkizgen jetistik. Týrnır barysynda «Astana» óziniń sheberligin, psıhologııalyq turaqtylyǵyn, jeńiske degen yntasyn ǵana emes, sonymen qatar, ádemi oıyn da kórsete aldy. Komandanyń chempıondyq tıtýly fýtbol klýby qyzmetiniń barlyq salalaryndaǵy saýatty ári durys júrgizilgen jumystyń jemisi. Árbir komanda múshesiniń óz isinde úzdik bolý nıeti men umtylysy ujymǵa bıylǵy maýsymda joǵary nátıjege qol jetkizýge múmkindik berdi. Á. Jaqsybekov «Astana» FK-nyń aldaǵy ýaqytta da tabysty óner kórsetetinine, jankúıerlerin jaqsy oıynmen qýantyp, qazaqstandyq fýtboldyń ıgiligine óziniń damýyn jalǵastyratynyna senimin bildirdi.
