Astanada fýtboldan Qazaqstan kýbogynyń jerebesi tartylady
ASTANA. QazAqparat - Astanada 18 aqpanda fýtboldan Qazaqstan kýbogynyń alǵashqy irikteý kezeńiniń jerebesi tartylady. Oǵan qatysatyn komandalar sany tolyqtaı belgili boldy, dep habarlaıdy QazAqparat tilshisi Qazaqstan kásipqoı fýtbol lıgasyna silteme jasap.
Jerebe tartý rásimi Astana ýaqytymen 15.00-de bastalady. Atalmysh shara barysy PFLK-TV arqyly tikeleı efırde ótkiziledi.
Aıta ketelik, alǵashqy kezeńde birinshi lıgada oınaıtyn «Akademııa Ońtústik», «Aqjaıyk» (Oral), «Altaı» (Semeı), «Kaspıı» (Aqtaý), «Qyzyljar SK» (Petropavl), «Qyran» (Shymkent), «Maqtaral» (Túrkistan oblysy) jáne «Ekibastuz» komandalary qatysady. Sondaı-aq, olardyń qataryna ekinshi lıgadan «Aqsý», «Arys» (Túrkistan oblysy), «Rýzaevka» (Soltústik Qazaqstan oblysy) jáne SDıÝSShOR №8 (Astana qalasy) jáne «Igilik» (Qarataý) , «Dıdar Sydyqbektiń fýtbol ortalyǵy» (Astana) syndy áýesqoı komandalar qosylady.
Jerebe tartý rásiminde atalmysh 12 komanda úsh-úshten tórt topqa bólinedi. Ár toptan úzdik shyqqan komandalar jarystyń 1/8 fınaldyq satysyna joldama alady. Bul kezeńde olarmen birge Premer-lıga komandalary da baq synaıdy.
Qazaqstan kýbogynyń alǵashqy kezeńi 19-27 naýryz kúnderi Shymkent qalasy men Túrkistan oblysynda ótkiziledi.
Budan buryn Qazaqstanda fýtbol jankúıerlerine arnalǵan mobıldik qosymsha jasalǵanyn habarlaǵan edik .
