Astanada frantsýzdyq ártis J.Depardeniń qatysýymen túsirilgen «Keshikken mahabbat» atty jańa qazaqstandyq fılmniń tanystyrylymy ótti

Buǵan deıin habarlaǵanymyzdaı, «Keshikken mahabbat» atty lırıkalyq-komedııanyń kórsetilimin buqaramen birge Qazaqstan Prezıdenti Nursultan Nazarbaev, kartınany jasaýshy tulǵalar men J.Depardeden bastap onyń basty rólderin somdaǵan ártister tamashalady.

Kórsetilimge deıin jýrnalısterge arnap baspasóz máslıhaty ótkizildi. «Tanaris kınokompanııasy» men Sh.Aımanov atyndaǵy «Qazaqfılm» kınostýdııasy týyndyny bıýdjettik jáne ózge kózderden tartylǵan 1,5 mln. AQSh dollaryna túsirdi. Stsenarıı avtorlarynyń biri Sergeı Ázimovtiń aıtýynsha, kartınany túsirýge jalpy daıyndyq 1 jylǵa jýyq ýaqytqa sozylǵan bolsa, ony túsirýge nebári 24 kún ketken. Kartına kóshirmeleriniń sany 25-30 dana. S.Ázimov ártisterdiń qalamaqysyn kommertsııalyq maqsatta qupııada qaldyrýdy jón kórip, tek J.Deparde Frantsııada taýyp júrgen tabysynan úsh ese az alǵanyn atap ótti.

«Maǵan Ázimov kınoǵa túsý usynysymen kelgende, aqshasynyń joqtyǵyn birden aıtty. Men stsenarıımen tanyspaı-aq birden kelistim. Sebebi men Qazaqstanǵa alǵash sapar shekkenimde bul tamasha elge qaıtyp keletinimdi bildim. Men qazaqstandyq týyndylarǵa túsýge qashan da daıynmyn. Óıtkeni, qazaqtyń mádenıeti ózinen alshaqtatpaı, adamdy kerisinshe baýraı túsedi», - dedi Astanaǵa alǵash atbasyn burǵan frantsýzdyq ártis.

Elordalyqtardyń nazaryna usynylǵan fılmniń qazaq tildegi nusqasynda frantsýzdyq ártiske dýblıajdy M.Áýezov atyndaǵy teatrdyń ártisi Tóleýbek Aralbaev jasady. Orysshasy tanymal akter Evgenıı Jumanovqa buıyrdy.

Eske salaıyq, Elbasy frantsýzdyq ártiske óziniń iltıpatyn buǵan deıin de bildirgen bolatyn. 2010 jylǵy qazan aıynyń sońynda N.Nazarbaev, J.Depardemen óziniń Frantsııaǵa resmı sapary barysynda kezdesti. «Qazaq eliniń Basshysymen bolǵan kezdesýdi óte jyly eske alamyn. Biz 45 mınýtqa jýyq ýaqyt áńgimelestik. N.Nazarbaev óz elin qanshalyqty súıetinin, onyń egemendigin sonshalyqty qasterleıtindigin aıtty», - deıdi J.Deparde.

«Keshikken mahabbat» fılminiń jelisi qartań tartqan úsh shal týraly órbıdi. Jubaıyn qara jerdiń qoınaýyna tapsyrǵan Qaltaı (Nurjuman Yqtymbaev) esimdi qart, qalada turatyn ózimen «taǵdyrlas» Jıde (Natalıa Orynbasarova) kórshisimen basqosýdy qalap, ol oıyn dostaryna (J.Deparde, Bolat Qalymbetov) aıtady. Qalalyq apamyz quda túsip barǵan «shaldardyń» betin qaıtarǵannan keıin, dostary Qaltaıǵa basqa jar izdeýge kirisedi. Orys kórshisinen bastap, kórshi aýyldaǵy alǵashqy mahabbatyna deıin izdep barady. Baıandy qartaıǵan shaǵynan kúderin úze bastaǵan qarııanyń usynysyn, «qalalyq» apaıymyz aqyrynda qabyldap, aýylǵa oralady.

Negizinde, bul kartınanyń alǵashqy tanystyrylymy emes. Esterińizde bolsa, onyń alǵashqy kórsetilimi ústimizdegi jylǵy qyrkúıek aıynda Almatyda ótken Eýrazııa kınofestıvalinde boldy. Onda ol «Kútpegen mahabbat» atpen usynyldy. S.Ázimovtiń sózine qaraǵanda, kınofestıvalda kartına kórermenderdiń jas ereksheligine qaramastan óte ystyq qabyldandy.

Aldaǵy ýaqytta qazaqstandyq jańa týyndy aldymen Reseı men Frantsııaǵa, odan keıin ózge shet el memleketterine jol tartady.

Fılm búgin, 7 jeltoqsan kúni almatylyq kórermenderdiń nazaryna usynylady.