Astanada frantsýz sýretshisiniń kórmesi ashyldy
ASTANA. 19 qańtar. QazAqparat - Keshe Astanadaǵy Ramada Plaza qonaq úıinde Frantsııanyń belgili sýretshisi Martın Rıvazı-Offannyń kórmesi ashyldy. Oǵan sýretshiniń qylqalamynan shyqqan on shaqty týyndy qoıylǵan. Jumystardyń barlyǵy Qazaqstannyń peızajyna arnalypty.
Sýretshi kúıeýiniń jumys babymen álemniń kóptegen elderinde turǵan. Ol sol elderdiń tabıǵatyn negizgi taqyrybyna aınaldyrǵan. Al osydan úsh jyl buryn Qazaqstanǵa kelipti.
«Meni Qazaqstannyń tabıǵaty ózine tánti etti. Keń dala, asqar taýlar, ózen-kólder, aýyl ómiri meniń shyǵarmashylyǵyma shabyt berdi. Sonyń nátıjesinde «Qaıyńdardyń úlken peızajy», «Daladaǵy alǵashqy qar», «Otardyń óristen qaıtýy (Qorǵaljyn mańy)» degen týyndylarym dúnıege keldi», - deıdi sýretshi áıel.
