Astanada frantsýz sýretshisi Anna de Kolber-Hrıstoforovtyń kórmesi ótýde
ASTANA. 20 shilde. QazAqparat - Qazaqstandaǵy Frantsııa jyly sheńberinde elimizdegi Frantsııa elshiligi men «Has Sanat» óner galereıasy frantsýz sýretshisi Anna de Kolber-Hrıstoforovtyń kórmesin uıymdastyrdy. Bul týraly astana.kz saıtynan habarlady.
Kórme Frantsııa-Qazaqstan eki mádenı maýsymynyń aıasynda ótýde. Anna de Kolber-Hrıstoforov - tanymal frantsýz áýleti - Kolberovtardyń urpaǵy, onyń áıgili ókili - frantsýz saıasatshysy, 1665-1683 jj. XIV Lıýdovık memleketti basqarǵanda qarjy mınıstri bolǵan Jan-Batıst Kolber bolyp tabylady.
Anna kórkem sýret, grafıka salasynda jumys isteıdi, ıllıýstratsııalar jasap, óleńder jazady.Birneshe poezııalyq jınaqtyń avtory. Parıjde turady jáne sonda eńbek etedi. Anna - kóptegen bedeldi sýretshilik shyǵarmashylyq birlestikteriniń múshesi, Rımde ótken Halyqaralyq dýmannyń (1989) altyn júldesin; «Bernhaım syılyǵyn» ıelengen, (Parıj, 1990), Brıýggede Halyqaralyq Kórmesiniń úshinshi syılyǵyn alǵan (Belgııa, 1996), "Dravey" salonynyń kúmis júldegeri, (Frantsııa, 2002), sondaı-aq, Ulttyq ásem ónerler qoǵamynyń atynan freska úshin marapattalǵan (Frantsııa, 2006), budan basqa da jetistikteri kóp.
Annanyń kúndelikti ómirden jáne qarapaıym zattardan poezııany baıqaý, shynaıylyq pen fantastıkany qıystyrý daryndylyǵy kórermen úshin onyń meıirimdi, sulý, keıde ókinishti, biraq árqashan da úndesetin ishki erekshe álemin pash etedi. Anna de Kolber-Hrıstoforovtyń eńbekteri negizinen tabıǵatqa arnalady. Ol naqty beıneler salady: aǵashtar, kóbelekter, ınelikter, aýyldyq jáne qalalyq peızajdar. Anna týyndylarynda ózindik eles-qııaldy, bálkim tústerin, kóńil kúıin, emotsııasyn jetkizýge tyrysady. Sýretshi úshin bir paraq qaǵazda nemese kórkem polotnoda óziniń izin qaldyrý asa mańyzdy.
Kórme Astanada 10 shilde - 10 tamyz aralyǵynda ótkiziledi.
