Astanada frantsýz rejısseriniń N. Nazarbaev týraly túsirgen derekti fılmi tanystyrylmaq

ASTANA. QazAqparat - QR Tuńǵysh Prezıdenti kúnin merekeleý aıasynda «Tuńǵysh-Pervyı» derekti kıno aptalyǵyn Qazaqstan Prezıdenti Nursultan Nazarbaev týraly túsirilgen «Ideıa ómirdi ózgertedi» derekti fılmi ashady.

Frantsýz rejısseri Rejıs Gezelbashtyń bul týyndysyna Elbasynyń ózi baǵa berip úlgergen.

"Men sizderdiń Prezıdentterińizben kezdesý baqytyna ıe boldym. Ol maǵan arnaıy ýaqytyn bóldi. Sonymen qatar suhbat alǵan kezimde ol atalǵan fılmniń 7 epızodyn qarap shyqty. Degenmen Prezıdent fılmniń aıaqtalǵan nusqasyn kórgen joq. Menińshe oǵan bul týyndy unaǵan sııaqty", - deıdi R. Gezelbash.

Frantsýz mamany derekti fılmdi QR Tuńǵysh Prezıdenti kitaphanasymen birigip túsirgen.

"Alǵash ret men Qazaqstanǵa 2004 jyly kelgenmin. Ol kezde qazaq-frantsýz kınosyna prodıýser boldym. Qazaqstanmen tanystyǵym sol kezde bastaldy. 2010 jyly men Qazaqstandaǵy din máselesine arnalǵan fılmge prodıýserlik ettim. Bul halyqaralyq festıvalderde óte jaqsy nátıjelerge qol jetkizgen fılm boldy", - dep atap ótti ol.