Astanada fotosýretshi Aleksandr Parhomenkonyń erekshe kórmesi ashyldy (FOTO)

ASTANA. QazAqparat - Búgin Qazaqstan Ulttyq mýzeıinde belgili qazaqstandyq fotosýretshi, slavıan mádenı ortalyǵynyń basqarma múshesi Aleksandr Parhomenkonyń «Meniń Otanym - Qazaqstan» atty kórmesi ashyldy.

Kórmege qoıylǵan 70-ten astam jumysta Qazaqstan terrıtorııasynda ómir súrip jatqan etnostardyń erekshelikteri, ulttyq mádenıetteriniń ár alýandyǵy kórsetilgen. A.Parhomenko óz jumystaryn fotosýretterdi kenepke aýdaryp, onda túsirilgen sátke kádimgi boıaýlarmen odan saıyn tereń mán berý arqyly jasap shyǵarady. «Búginde men bar kúshim men ónerimdi memleketimizdiń jetken jetistikteri men alǵan asýlaryn kórkem túrde sýrettep berýge salyp jatyrmyn. Al bizdiń elimizdiń eń úlken jetistigi Qazaqstan halqy Assambleıasy dep aıtýǵa bolady. Sondyqtan meniń búgingi patsha kóńilimmen kórermenge usynyp otyrǵan kórmem de Qazaqstannyń tatý-tátti halqyn kórsetýge arnalady», - deıdi kórme avtory. Aıta keteıik, Aleksandr Parhomenko 2006 jyldan beri jeke kórmelerin Qazaqstanda ǵana emes, sonymen qatar shet elderde de ótkizip kele jatyr. Qazir sýretshi óz ónerin S.Toraıǵyrov atyndaǵy Pavlodar memlekettik ýnıversıteti men Pavlodar qalasynyń kolledji stýdentterine úıretýde. QR Ulttyq mýzeıindegi kórme 24 sáýirden bastap 14 mamyrǵa deıin jumys jasaıdy.