Astanada «Formýla-1» trassasyn salý usynyldy
ASTANA. KAZINFORM – Astanada «Formýla-1» jarysyna arnalǵan trassa, Open Air is-sharalary ótetin alań jáne attraktsıondar parkin salý usynyldy. Bul bastamalar elordanyń týrızm salasyn damytý strategııasyn ázirleý aıasynda qarastyrylyp otyr.
Bul týraly «Future of Mobility» JShS-niń damý jónindegi dırektory Ulybek Qımanov Astana qalasy máslıhatynda ótken qoǵamdyq tyńdaýda málimdedi.
Ol elordanyń týrızm salasyn damytý strategııasyn ázirleýdiń aralyq nátıjelerin tanystyrdy. Qujatty ázirleý barysynda mamandar Astananyń týrıstik áleýetin saralap, sheteldik týrısterdi tartýdyń negizgi baǵyttaryn qarastyrǵan.
Ulybek Qımanovtyń aıtýynsha, sonyń biri – Astanany Ortalyq Azııadaǵy iri is-sharalar ótetin ortalyq retinde damytý.
– Osy baǵytta Astanada «Formýla-1» jarysyna arnalǵan trassa, Open Air is-sharalary ótetin alań jáne attraktsıondar parkin salý usynylyp otyr, – dedi Ulybek Qımanov.
Budan bólek, strategııany ázirleýshiler elordada etnoortalyq, jańa mýzeıler men gastronomııalyq kósheler ashýdy usynǵan.
Buǵan deıin Astanada aýmaǵy 10 myń sharshy metr bolatyn Ortalyq Azııadaǵy eń iri jabyq attraktsıon parkin iske qosý josparlanyp otyrǵanyn jazdyq.
