Astanada Fly Park ekstremaldy skeıt alańy ashyldy
ASTANA. KAZINFORM — Elordanyń Baıqońyr aýdanyndaǵy «Atatúrik» saıabaǵynda zamanaýı Fly Park ekstremaldy skeıt alańy ashyldy. Jańa nysan jastar arasynda salaýatty ómir saltyn nasıhattaýǵa baǵyttalǵan, dep habarlaıdy qala ákimdiginiń resmı saıty.
Jańa alań jastardyń belsendi demalysyn uıymdastyrýǵa jáne ekstremaldy sport túrlerin damytýǵa baǵyttalǵan. Munda BMX velosıpedteri, trıýktik samokattar men skeıtbord tebýge arnalǵan arnaıy aımaqtar qarastyrylǵan.
Fly Park alańy 6 trıýktik elementten turady. Qurylymnyń bıiktigi 3,5 metrden asady, syrǵanaý alańy bir mezette 25 adam ýaqvtyn ótkize alady.
— Ashylý qurmetine oraı biz shaǵyn jarystar uıymdastyryp otyrmyz. Búgin oǵan qalamyzdyń turǵyndarymen qatar, jaqyn mańdaǵy óńirlerdiń turǵyndary da qatysyp jatyr, — dep atap ótti Baıqońyr aýdanynyń ákimi Talǵat Rahmanberdi.
«Zań men tártip» qaǵıdaty aıasynda alańda «Astana esirtkige qarsy» atty aktsııa da ótti. Uıymdastyrýshylar qatysýshylarǵa salaýatty ómir saltynyń mańyzdylyǵy, esirtki quqyqbuzýshylyqtarynyń aldyn alý jáne zııandy ádetterdiń ornyna sport pen belsendi demalysty tańdaýdyń qajettiligi týraly aıtyp berdi.
— Bul alań adamdardy bir maqsatqa — salaýatty ómir saltyn ustanýǵa biriktiredi. Sport pen belsendi ómir salty — esirtkige balama. Sporttyq ortada adamdardyń maqsaty, ómirlik jospary jáne damýǵa degen umtylysy bolady. Munda esirtkige oryn joq. Sondyqtan biz jastardy árdaıym sportpen aınalysýǵa, salaýatty ómir saltyn tańdaýǵa jáne esirtkisiz bolashaqty tańdaýǵa shaqyramyz, — dedi elordalyq Polıtsııa departamenti Esirtki qylmysyna qarsy is-qımyl basqarmasynyń jedel ýákili, polıtsııa kapıtany Jandos Setenov.
Búginde qala boıynsha ekstremaldy sport túrlerimen 2000-nan astam adam júıeli túrde aınalysady. Osyǵan baılanysty jańa sporttyq keńistiktiń ashylýy jastar arasynda salaýatty ómir saltyn nasıhattaýǵa, sporttyq ınfraqurylymdy damytýǵa jáne qala turǵyndarynyń bos ýaqytyn tıimdi uıymdastyrýǵa úlken múmkindik beredi.
Budan buryn ákim Jeńis Qasymbek LRT jobasy tolyq iske assa, uzyndyǵy 100 shaqyrymǵa jetetinin aıtty.
