Astanada fıtosanıtarııalyq talaptardy buza otyryp ákelingen sándik ósimdikter joıyldy
ASTANA.KAZINFORM - Zań buzýshylyq QR AShM AÓK MIK aýmaqtyq ınspektsııasynyń memlekettik fıtosanıtarııalyq ınspektorlary júrgizgen fıtosanıtarııalyq baqylaý barysynda anyqtaldy.
Tekserý kezinde sándik ósimdikterdiń Reseı Federatsııasynan eksporttaýshy eldiń ósimdikter karantıni jáne olardy qorǵaý jónindegi ulttyq uıymy berýge tıis mindetti fıtosanıtarııalyq sertıfıkatsyz ákelingeni anyqtaldy.
Osy derek boıynsha zańdy tulǵaǵa qatysty ósimdikter karantıni salasyndaǵy zańnamany buzǵany úshin ákimshilik is qozǵaldy.
Fıtosanıtarııalyq qaýipsizdik talaptaryna sáıkes júk ıesine anyqtalǵan zań buzýshylyqtardy joıý týraly nusqama berildi. Óz kezeginde ónim ıesi ustalǵan ónimdi órteý arqyly joıý týraly sheshim qabyldady.
Komıtet Qazaqstan Respýblıkasynyń aýmaǵyna karantınge jatqyzylǵan ónimdi tek eksporttaýshy el bergen fıtosanıtarııalyq sertıfıkaty bolǵan jaǵdaıda ǵana ákelýge ruqsat etiletinin eske saldy. Bul talaptardy saqtaý aýyl sharýashylyǵyna jáne qorshaǵan ortaǵa zııan keltirýi múmkin qaýipti karantındik obektilerdiń el aýmaǵyna enýi men taralýyna jol bermeýge baǵyttalǵan.
Aıta keteıik, SQO-da byltyr fıtosanıtarııalyq baqylaý aıasynda 6 mln teńge aıyppul salyndy.
Fıtosanıtarııalyq talapqa saı kelmeıtin 6 tonna qııar Reseıge qaıtaryldy.
