Astanada Fılıppın elshiligi ashylýy múmkin
ASTANA. KAZINFORM — Qazaqstan Respýblıkasynyń Syrtqy ister mınıstri Muhtar Tileýberdi Fılıppın Respýblıkasy Syrtqy ister mınıstriniń orynbasary Leo M. Errera-Lımdi qabyldady. Bul týraly vedomstvonyń baspasóz qyzmeti málim etti.
Leo M. Errera-Lım Astanaǵa Qazaqstan men Fılıppınniń syrtqy saıası vedomstvolary arasyndaǵy saıası konsýltatsııalardyń ekinshi raýndyna qatysý úshin keldi.
Kezdesý barysynda taraptar ekijaqty kún tártibindegi ózekti máselelerdi jáne Qazaqstan men Fılıppın arasyndaǵy qarym-qatynastardy odan ári damytý perspektıvalaryn talqylady. Saýda-ekonomıkalyq jáne ınvestıtsııalyq yntymaqtastyqty keńeıtýge, sondaı-aq BUU men ASEAN sheńberindegi ózara is-qımyldy nyǵaıtýǵa erekshe nazar aýdaryldy.
Muhtar Tileýberdi elder arasyndaǵy saıası dıalogtyń oń dınamıkasyn atap ótti. Atap aıtqanda, ol BUU Bas Assambleıasynyń 81-sessııasy aıasynda qyrkúıek aıynda Fılıppınniń syrtqy ister mınıstri M.T. Lazaromen ótken kezdesýin eske saldy.
Qazaqstan tarapy Fılıppınniń Astanada elshilik ashý nıetin quptady. Kezdesýge qatysýshylardyń pikirinshe, turaqty dıplomatııalyq ókildiktiń ashylýy ekijaqty baılanystardy nyǵaıtýǵa jáne praktıkalyq yntymaqtastyqty keńeıtýge múmkindik beredi.
Kelissózder qorytyndysy boıynsha taraptar turaqty saıası dıalogty qoldaýǵa jáne Qazaqstan men Fılıppın arasyndaǵy yntymaqtastyqty júıeli túrde damytýǵa daıyn ekenderin rastady.
Buǵan deıin 1 qarashadan bastap Qazaqstan azamattary Belgııaǵa, Nıderlandqa jáne Lıýksembýrgke qyzmettik pasporttarymen vızasyz bara alatyny habarlanǵan edi.
