Astanada feldsherdi urǵan adam qamaýǵa alyndy

ASTANA. KAZINFORM – Elordada jedel medıtsınalyq járdem brıgadasynyń feldsherin urǵan er adam ustaldy, - dep habarlaıdy Polisia.kz.

Medıtsınalyq qyzmetkerge qatysty kúsh qoldaný faktisi boıynsha qylmystyq is qozǵaldy. Anyqtalǵandaı, jedel járdem brıgadasy saýda ortalyǵyna shaqyrtý boıynsha barǵan. Onda mas kúıde bolǵan eki er adam bolǵan. Olardyń biri ózin jaısyz sezingenin aıtqan.

Medıtsına qyzmetkerleri qajetti tekserý men kómekti kórsetkennen keıin oqıǵa ornynan ketýge daıyndalǵan kezde er adamdardyń biri agressıvti áreket tanytyp, feldsherge soqqy jasaǵan.

Oqıǵa kýágerleri polıtsııa qyzmetkerlerin shaqyrǵan. Kúdikti oqıǵa ornynda ustalyp, ýaqytsha ustaý ızolıatoryna qamaldy.

– Polıtsııa eskertedi: mańyzdy áleýmettik mindet atqaryp júrgen jedel qyzmet ókilderine qatysty agressııa, kúsh qoldaný nemese qorqytý áreketteriniń kez kelgeni qatań túrde toqtatylady. Qazaqstanda medıtsınalyq qyzmetkerge, sondaı-aq qyzmettik mindetin atqaryp júrgen jedel járdem kóliginiń júrgizýshisine qatysty qorqytý nemese kúsh qoldaný úshin jaýapkershilik kúsheıtildi. 7 naýryzda Qazaqstan Respýblıkasy Qylmystyq kodeksiniń 380-3-baby kúshine endi. Atalǵan bap boıynsha aıyppuldan bastap, 12 jylǵa deıin bas bostandyǵynan aıyrý jazasy qarastyrylǵan, - delingen habarlamada.

Aıta keteıik, Densaýlyq saqtaý mınıstrligi jedel járdem qyzmetkerlerin qosymsha ózin-ózi qorǵaý buıymdarymen qamtamasyz etý boıynsha shara qabyldaýdy oılastyryp otyr.

Elordada turǵyn úı qasbetiniń kirpish qaptamasy qulap, jaraqat alǵan feldsher kóz jumdy.