Astanada FEI Álem kýbogy Eýrazııalyq lıgasynyń fınaly ótedi
ASTANA. KAZINFORM — Astanada 18-22 qarasha kúnderi halyqaralyq At sporty federatsııasynyń (FEI) konkýrdan Álem kýbogy Eýrazııalyq lıgasynyń fınaly — FEI Jumping World Cur Eurasian League Final CSI-W Astana 2026 ótedi. Bul týraly elorda ákimdiginiń resmı saıty habarlady.
Halyqaralyq týrnır «Arǵymaq» at sporty kesheniniń jabyq manejinde uıymdastyrylyp, Eýrazııalyq lıganyń jetekshi shabandozdarynyń basyn qosady.
Jarysqa FEI Álem kýbogy Eýrazııalyq lıgasynyń jalpy reıtınginde joǵary nátıje kórsetken sportshylar qatysady. Týrnırde reıtıng qorytyndysy boıynsha úzdik 40 shabandoz óner kórsetedi.
Budan bólek, Eýrazııalyq at sporty qaýymdastyǵy (EEA) sheteldik sportshylarǵa qosymsha shaqyrtý jiberýi múmkin. Qabyldaýshy el atynan 10-ǵa tarta qazaqstandyq shabandoz qatysa alady. Týrnırge qatysýshylardyń jalpy kvotasy — 60 adam.
Týrnırge qatysý týraly 11 eldiń ulttyq federatsııasyna shaqyrtý jiberildi. Olar: Qazaqstan, Ózbekstan, Qyrǵyzstan, Belarýs, Iran, Ázerbaıjan, Armenııa, Grýzııa, Moldova, Reseı jáne Túrikmenstan.
— Eýrazııalyq lıga fınalynyń Astanada uıymdastyrylýy Qazaqstanda at sportyn damytýǵa tyń serpin beredi. Jarys otandyq shabandozdarǵa halyqaralyq arenada baq synap, sheteldik sportshylarmen tájirıbe almasýǵa jáne óz sheberligin kórsetýine jol ashady. Halyqaralyq jarys at sportyn keńinen nasıhattaýǵa jáne Astananyń iri sporttyq is-sharalardy ótkizý ortalyǵy retindegi mártebesin nyǵaıtýǵa da yqpal etedi, — delingen aqparatta.
Aıta keteıik, «Arǵymaq» at sporty kesheninde ótetin saıysqa kórermender tegin kire alady.
Bıyl Azııa oıyndarynda shabandoz Oleg Sokolenko Cinderella atty atpen óner kórsetip, jarysty 14-orynmen aıaqtady. Al Quibelle Van D’Abelendreef atty atqa mingen Nurıla Turysbekova ekinshi kezeńde belgilengen baǵytty tolyq júrip óte almady.
