Astanada Farıza Ońǵarsynova turǵan úıdiń qabyrǵasyna memorıaldyq taqta qoıyldy
Astananyń bas kósheleriniń birine Dinmuhamed Qonaevtyń esimi berilgeni belgili. Sol kóshe boıyndaǵy eńseli ǵımaratta aqyn 2009-2014 jyldary turǵan eken. Sharapatty sharanyń tizginin ustaǵan Parlament Májilisiniń depýtaty Qýanysh Sultanov kelgen qonaqtardyń keleli pikirlerin tyńdaý úshin kezegimen sóz berip turdy.
«Jańa aıtylǵandaı ótken ǵasyrdyń 70-shi jyldarynyń aıaǵynda, 80-jyldarynyń sońynda qazaq ádebıetine keremet bir tolqyn keldi. Olar shetinen talantty edi. Solardyń ishinde erekshe kózge túsken, kele salyp bir-eki jyldyń ishinde ózin moıyndatqan Farızanyń bolmysy bólek edi. Farızaǵa biz esh ýaqytta qyz bala dep qaraǵan joqpyz. Birge júrgen dosymyz, zamandasymyz dep qaradyq. Ásirese, Astanaǵa kelgennen keıin baýyrmal rýhanı sananyń ókilderi bir aýyl bolyp kettik. Qazir Farızasyz sol aýyldyń bir kirpishi kem sekildi. Muqaǵalı qalaı jasasa, Tumanbaı qalaı jasasa, Saǵı Jıenbaev qalaı jasasa Farıza da solaı qazaq tarıhynda jasaı beredi. Biz oǵan senimdimiz», - dedi alǵash bolyp sóz alǵan jazýshy, Farızanyń janashyr aǵalarynyń biri, Memlekettik syılyqtyń laýreaty Ákim Tarazı.
Estelik taqtanyń ashylý saltanatyna el aǵalary da atbasyn burǵanyn aıta ketsek deımiz. Olardyń qatarynda memleket jáne qoǵam qaıratkeri Ómirbek Baıgeldı, Májilis depýtaty Orazkúl Asanǵazy, senator Birǵanym Áıtimova, «Egemen Qazaqstan» RG» AQ prezıdenti Saýytbek Abdrahmanov, S.Seıfýllın murajaıynyń dırektory, belgili aqyn Nesipbek Aıtuly, aıtýly jyr dúldúli Serik Turǵynbekuly men Ońaıgúl Turjan bar.
Alashtyń aqyn qyzyna degen izgi iltıpattaryn aǵalary aǵynan jaryla sózben jetkizse, óleń ólkesinde ókshesin basqan ini-sińlileri jyrmen joldady. Taqtanyń lentasyn qııý qurmetine Ákim Tarazı men Ómirbek Baıgeldı ıe boldy, dep jazady «Egemen Qazaqstan» basylymy.
