Astanada EXPO-2017 kórmesiniń úzdik urany men esse shyǵarmasy anyqtaldy
ASTANA. 12 jeltoqsan. QazAqparat /Jasulan Amanbaıuly/ - Astanada «Bolashaq energııasy. EXPO-2017 qolda! Memleketti qolda!» taqyrybynda ótkizilgen úzdik uran men esse shyǵarmalarynyń respýblıkalyq baıqaýy márege jetti.
Oǵan Astana men Almaty qalalarynan, sonymen qatar Qazaqstannyń barlyq óńirlerinen oqýshylar óz jumystaryn usynǵan bolatyn. Jalpy, qazylardyń aldyna qazaq, orys jáne aǵylshyn tilderinde 60-tan astam jumys kelip túsken.
Atalmysh taqyrypta eń úzdik esse Qaraǵandy oblysynyń týmasy Maǵjan Qutjannyń shyǵarmasy bolyp tanyldy. Al aǵylshyn tilindegi «Save Today. Survive Tomorrow» atty úzdik urannyń avtory elordadaǵy L. Gýmılev atyndaǵy Eýrazııa ulttyq ýnıversıtetiniń stýdenti Gaýhar Janjolova atandy.
Jeńimpazdardy baıqaý komıssııasynyń ókilderi arnaıy syılyqtarmen marapattady. Qazylar alqasynyń tóraǵasy Qaırat Tilepaldınniń aıtýynsha, el jastary balamaly energııa kózderin damytýdyń memlekettiń órkendeýine qosar úlesi men mańyzyn uǵynady. Sondyqtan da bolar jastar atalǵan baıqaýǵa belsene aralasty.
Onyń aıtýynsha, úlken aýmaqty alyp jatqan Qazaqstan memleketi ınnovatsııaǵa, kúnnen, jelden óndiriletin balamaly energııa kózderin damytýǵa asa zor mán berýde. Bul energııanyń ózindik qunyn tómendetip, halyqtyń ómir sapasyn áldeqaıda joǵarylatady.
Baıqaý 12 qyrkúıek pen 30 qarasha aralyǵynda Astana qalasynyń halyqaralyq EXPO-2017 mamandandyrylǵan kórmesin ótkizýge bergen usynysy aıasynda ótkizildi.
