Astanada evakýatsııa erejesin elemegen bıznes obektilerge aıyppul salyndy

ASTANA. QazAqparat – Elordadaǵy bıznes obektilerdi tekserý nátıjesinde órt qaýipsizdigi erejelerine sáıkes kelmeıtin 4 195 derek anyqtaldy. Bul týraly kommýnıkatsııalar qyzmetinde ótken brıfıngide Astana qalasy Tótenshe jaǵdaılar departamenti memlekettik órt baqylaý basqarmasynyń basshysy Erkin Otarǵalymuly aıtty, dep habarlaıdy QazAqparat tilshisi.

«Órt qaýipsizdigi jelisi boıynsha 1 069 tekserý júrgizildi. Onyń nátıjesi boıynsha órt qaýipsizdigi erejelerine sáıkes kelmeıtin 4 195 derek anyqtaldy. Olarǵa jol bergen 352 adam, onyń ishinde 188-i 15 mln 782 myń teńgeden astam somaǵa aıyppul túrinde ákimshilik jaýapkershilikke tartyldy.

Memlekettik órt baqylaý organdarynyń zańdy talaptaryn oryndamaǵan sýbektilerge qatysty Astana qalasynyń mamandandyrylǵan aýdanaralyq ákimshilik sotyna 47 ákimshilik is berildi», - dep toqtaldy Erkin Otarǵalymuly.

Onyń aıtýynsha, bıznes obektilerinde anyqtalǵan negizgi olqylyqtar - evakýatsııa joldarynyń durys uıymdastyrylmaýy, elektr jelilerindegi aqaý, órtke qarsy sýmen jabdyqtaý júıelerin kútip ustamaý.