Astanada EUÝ bazasynda 2 467 oryndyq jataqhana salynady

ASTANA. QazAqparat - 2019-2021 jyldary L.N.Gýmılev atyndaǵy Eýrazııa ulttyq ýnıversıteti bazasynda 3 bloktan turatyn 2 467 oryndyq jataqhana salynady. Bul týraly keshe atalmysh ýnversıtettiń rektory, QR UǴA akademıgi Erlan Sydyqov dástúrli esep berý kezdesýinde málim etti, dep habarlaıdy QazAqparat tilshisi.

«Bilim alýshylardyń áleýmettik-azamattyq damý jaǵdaıy bir sát te esten shyqqan emes. Elbasynyń «Bes áleýmettik bastama» baǵdarlamasy senderge de, bizge de zor serpin berdi. Biz jaqsylyqtan úmit etemiz. Qarap jatpaı, óz tarapymyzdan ár jyly keminde bir áleýmettik nysandy iske qosýǵa tyrysamyz», - dedi rektor.

Onyń aıtýynsha, MMÝ fılıalynyń jataqhanasy, №7 Stýdentter úıi túrli ekonomıkalyq qıyndyqtarǵa qaramastan ýaqytynda tapsyrylǵan. 

«Ras, jataqhana boıynsha birshama problema bar. Ony Elbasyna deıingi el tulǵalary bilip otyr. Bári birte-birte sheshiledi. Qazirgi 7 oqý-zerthanalyq ǵımaratymyz, 7 stýdentter úıi, jas ǵalymdar úıi, «Eýrazııa» sport kesheni, «Tumar» sport-saýyqtyrý bazasy, ǵylymı kitaphana, startap - bári de áleýmettik ıgiligimiz. Jańa № 7 stýdentter úıinde jastarǵa arnalǵan kovorkıng-ortalyq ashylyp, sport ortalyǵyn qoldanysqa berý josparlanyp otyr. Munda mobıldik baılanyspen kelgen sheteldik stýdentter de laıyqty ornalastyryldy. Buıyrsa, 2019-2021 jyldary 3 bloktan turatyn 2 467 oryndyq jataqhana qurylysyn bastamaq oıymyz bar. Bul - Elbasy tapsyrmasyn oryndaý jolyndaǵy jaýapty is-shara», - deıdi Erlan Sydyqov.