Astanada eýropalyq deńgeıdegi gastronomııalyq bazar salynady
ASTANA. QazAqparat - Astanada eýropalyq deńgeıdegi gastronomııalyq bazar salynady. Onyń ereksheligi organıkalyq, fermerlik ónimderge basymdyq berilýinde, dep habarlaıdy QazAqparat.
Qala ákimdiginiń baspasóz qyzmetinen málim etkendeı, bazardyń ishki jaǵy standartty bazarlardan erekshelenedi. Onymen qosa, satýshylar men qyzmet kórsetýshi personaldyń biryńǵaı formasy, ǵımarattyń óz zerthanasy, satylatyn ónimge qoıylatyn biryńǵaı SES standarttary bolady. Onda tek sapaly ári tańdaýly ónimder usynylmaq.
Birinshi qabatta fermerlik bazar, naýbaıhana, dúńgirshekter, 7 kınozal ornalasady. Ekinshi qabatta fastfýd, tehnıka jáne elektronıka dúkenderi, qyzmettik jáne qoıma bólmeleri bolatyny josparlanýda. Bundaı bazarlar London, Amsterdam, Lıssabon, Barselona, Moskva, Odessa sııaqty birqatar eýropalyq qalalarda óte kóp.
«Organıkalyq, fermerlik ónimderdiń basym bolýy, tutynýshylardyń ónimdi birden óndirýshilerden alýy bazardyń basty ereksheligi. Sonymen qatar, bazar aýmaǵynda únemi áleýmettik jármeńkeler, jergilikti sharýa qojalyqtary men fermerlerdiń qatysýymen ótetin festıvalder uıymdastyrý kózdeledi. Jobany júzege asyrý arqyly shamamen 1500 jumys orny paıda bolady», - dep atap ótti «Astana» ÁKK-den.
«Gastronomııalyq bazar» Beısekova jáne Sh.Qosshyǵululy kósheleriniń qıylysynda salynady. Qurylysy 2019 jyldyń ekinshi toqsanyna josparlanǵan.
