Astanada Eýropalyq ımmýndaý aptalyǵy ótip jatyr

ASTANA. KAZINFORM – 19-25 sáýir aralyǵynda álem boıynsha Eýropalyq ımmýndaý aptalyǵy ótýde. Osyǵan oraı elordada turǵyndardy aqparattandyrý jáne vaktsınatsııaǵa degen senimdi arttyrýǵa baǵyttalǵan birqatar is-shara uıymdastyrylyp jatyr, dep habarlaıdy qala ákimdiginiń resmı saıty.

Bıylǵy aptalyqtyń urany – «Vaktsınalar árbir urpaqqa paıdaly». Mamandardyń aıtýynsha, vaktsınatsııa tek medıtsınalyq shara ǵana emes, ol qoǵam densaýlyǵyn nyǵaıtýdyń mańyzdy quraly.

– Vaktsınatsııa balalardyń deni saý bolyp ósýine, eresekterdiń belsendi ómir súrýine jáne egde jastaǵy adamdardyń qaýipsiz ári uzaq ómir súrýine yqpal etedi. Bul – qoǵamdyq densaýlyqty qorǵaýdyń negizgi tetikteriniń biri, – delingen habarlamada.

Aptalyq aıasynda medıtsınalyq uıymdar men qoǵamdyq oryndarda túsindirý kezdesýleri ótkizilip, turǵyndar vaktsınatsııaǵa qatysty suraqtaryna jaýap ala alady. Sonymen qatar foto jáne art-kórmeler uıymdastyrylyp, sala mamandarynyń beıneúndeýleri usynylady.

Іs-sharalarǵa Eýropa odaǵy elderiniń elshileri qatysyp, bastamanyń halyqaralyq deńgeıdegi mańyzyn aıqyndaı túsýde.

– Eýropalyq ımmýndaý aptalyǵy halyqtyń vaktsınatsııaǵa degen senimin arttyrýǵa jáne aldyn alý sharalarynyń tıimdiligin túsindirýge baǵyttalǵan keshendi platforma bolyp tabylady, – dep atap ótilgen.

Sharalar Astana qalasynyń ákimdigi men Dúnıejúzilik densaýlyq saqtaý uıymynyń Qazaqstandaǵy ókildigi birlesip uıymdastyrýda.

Aıta keteıik, elde vaktsınadan bas tartý jaǵdaılary sońǵy 8 jylda 4,8 ese artqan.