Elordada eýropalyq deńgeıdegi avıatsııalyq oqý ortalyǵy ashylýy múmkin
ASTANA. KAZINFORM — Qazaqstan men Frantsııa azamattyq avıatsııa salasynda kadrlardy daıarlaý boıynsha yntymaqtastyq týraly kelisimge keldi.
Memleket basshysy Qasym-Jomart Toqaevtyń kadrlardy daıarlaý júıesin jańǵyrtý jáne halyqaralyq ǵylymı-bilim berý ortalyqtarymen yntymaqtastyqty damytý jónindegi tapsyrmasy aıasynda Qazaqstan Respýblıkasy Kólik vıtse-mınıstri Talǵat Lastaev bastaǵan qazaqstandyq delegatsııa Frantsııanyń Azamattyq avıatsııa ulttyq mektebiniń (ENAC) dırektory Olıve Shansý jáne onyń orynbasary Nıkolıa Kalazıspen jumys kezdesýin ótkizdi.
Kezdesý barysynda Eýropanyń jetekshi avıatsııalyq mamandar daıarlaý ortalyǵymen Astanada eýropalyq deńgeıdegi óńirlik avıatsııalyq oqý ortalyǵyn ashý máseleleri talqylandy. Atalǵan ortalyq azamattyq avıatsııa salasyndaǵy zamanaýı bilim berý standarttarynyń óńirlik ortalyǵyna aınalmaq. Elde mundaı oqý ortalyǵynyń bolýy salanyń sheteldik oqý uıymdaryna táýeldiligin azaıtyp, elimizde bilikti mamandar daıarlaýǵa múmkindik beredi. Bul yntymaqtastyq sondaı-aq salanyń otandyq kadrlaryn júıeli túrde daıarlaýǵa jáne tájirıbe, bilim men halyqaralyq praktıkalar almasýǵa baǵyttalatyn bolady.
Qazaqstannyń azamattyq avıatsııasy turaqty ósim kórsetip keledi: jyl saıyn jolaýshylar aǵyny artyp, marshrýttyq jeli keńeıýde, ınfraqurylym jańǵyrtylýda jáne áýe kemeler parki ósýde. Bul protsesterdi qoldaý úshin elge turaqty túrde bilikti mamandar qajet.
Otandyq avıatsııa salasynyń jyl saıynǵy qajettiligi shamamen 500–600 mamandy — ushqyshtardy, ınjenerlerdi, áýe qozǵalysyn basqarý dıspetcherlerin, jerústi qyzmetkerlerin jáne basqa da negizgi baǵyttar boıynsha mamandardy quraıdy.
Sonymen qatar, Qazaqstanda jumys istep turǵan avıatsııalyq oqý ortalyqtary Eýropalyq ushýlar qaýipsizdigi agenttigi (EASA) belgileıtin ozyq eýropalyq standarttarǵa sáıkes kelmeıdi. Aıta ketý kerek, Azamattyq avıatsııa ulttyq mektebi (ENAC) Halyqaralyq azamattyq avıatsııa uıymy (IKAO), Eýropalyq ushýlar qaýipsizdigi agenttigi (EASA), Halyqaralyq áýe kóligi qaýymdastyǵy (IATA) jáne Halyqaralyq áýejaılar keńesi (ACI) talaptaryna tolyq sáıkes keletin jalǵyz oqý orny.
Bul bastama Qazaqstannyń azamattyq avıatsııa salasynda joǵary bilikti kadrlardyń tapshylyǵyn joıýǵa jáne onyń aldyn alýǵa baǵyttalǵan, sondaı-aq bul ushýlar qaýipsizdigin arttyrýǵa, memlekettik qadaǵalaýdyń tıimdiligin kúsheıtýge jáne eldiń avıatsııalyq ınfraqurylymyn damytýǵa yqpal etedi.
Sapar aıasynda ENAC basshylyǵy oqý ornynyń negizgi nysandaryna tanystyrý ekskýrsııasyn ótkizdi. Kezdesý qorytyndysy boıynsha taraptar osy másele boıynsha yntymaqtastyqty jalǵastyrýǵa kelisti.
Anyqtama úshin: Azamattyq avıatsııa ulttyq mektebi (ENAC) 1946 jyly Týlýza qalasynda qurylǵan. Búginde ENAC álemniń 117-den astam elimen yntymaqtastyq ornatqan jáne 350-den astam oqý jáne biliktilikti arttyrý baǵdarlamalaryn júzege asyrady.
Aıta ketelik Qazaqstan men Frantsııa ushaq jetkizý týraly kelisim jasasqan edi.