Astanada Euronews Ortalyq Azııa haby ashylady
ASTANA. KAZINFORM — Búgin Brıýsseldegi jumys sapary barysynda QR Mádenıet jáne aqparat mınıstri Aıda Balaeva Euronews Dırektorlar keńesiniń tóraǵasy Pedro Vargas Devıdpen kezdesý ótkizdi. Kezdesý barysynda taraptar Astanada Euronews Ortalyq Azııa habynyń ókildigin ashý týraly kelisimge qol qoıdy. Bul týraly QR Mádenıet jáne aqparat mınıstrliginiń baspasóz qyzmeti málim etti.
Qazaqstan Ortalyq Azııa óńirinde sheshýshi ról atqara otyryp, memleket ómiriniń barlyq salalarynda aýqymdy ózgerister júrgizip otyr. Sondyqtan Astanada Euronews ókildiginiń ashylýynyń tarıhı mańyzy zor.
«Biz úshin bul Qazaqstandy álemge qaıta tanystyrýǵa keremet múmkindikter ashatyn mańyzdy oqıǵa. Qazaqstan — uly kóshpendiler órkenıetiniń tikeleı murageri ǵana emes eń baı mádenı jáne tarıhı murasy, tamasha tabıǵaty, tanymal adamdary bar memleket. Qazaqstan — búginde Prezıdent Qasym-Jomart Toqaevtyń ozyq ıdeıalary negizinde buryn-sońdy bolmaǵan ózgeristerimen qalyptasqan zamanaýı álemniń bir bóligi. Qazaqstan — órkenıetti álemmen óziniń qaıtalanbas rýhanı-mádenı murasy jáne áleýmettik-ekonomıkalyq áleýetin bólisýge ǵana emes, beıbitshilik úshin jan júregin berýge daıyn memleket. Sondyqtan men Euronews komandasynyń Qazaqstan týraly búkil álemge elimizdiń júregi — ásem Astanadan habar taratatynyna óte qýanyshtymyn!» — dedi Aıda Balaeva kezdesýde.
Euronews komandasy jaqyn arada qazaqtyń óneri, mádenıeti men ómir salty týraly modern nomads teleshoýyn, eldegi iskerlik jáne ekonomıkalyq oqıǵalardy, «Ortalyq Azııadan shyqqan daýystardy» — óńirdiń belgili qaıratkerlerimen suhbattardy, iri óńirlik is-sharalardy jáne oqytý trenıngterin ótkizýdi qamtıtyn «Shyǵys pen Batystyń baılanysy» baǵdarlamasyn, birqatar reportajdaryn kórsetýdi josparlap otyr jáne otandyq BAQ jáne baspasóz qyzmetkerleriniń biliktiligin arttyrý úshin sheberlik sabaqtaryn ótkizbek.
«Bul Qazaqstan úshin de, Euronews úshin de óte mańyzdy qadam. Men qazaqstandyq taraptan bul Astanada hab quratyn alǵashqy iri halyqaralyq jańalyqtar oıynshysy ekenin túsinemin. Bul eldiń álemge qanshalyqty ashyq ekenin kórsetedi. Euronews turǵysynan bizdiń shyǵysqa qaraı qanat jaıýymyz. Qazaqstan Eýrazııa qurlyǵynyń ortalyǵy jáne bizdiń Eýropa elderinde ǵana emes, kontınentten tys jerlerde bar ekenimizdi kórsetedi. Biz búkil álem boıynsha 1,2 mıllıard kórermenderi bar arnamyz, sondaı-aq Ortalyq Azııada shyǵýymyz kópten beri josparlanǵan bolatyn», — dep atap ótti Euronews Dırektorlar keńesiniń tóraǵasy Pedro Vargas Devıd.
Euronews aǵymdaǵy jyldyń qyrkúıek aıynda Astanada ótetin, aýqymdy halyqaralyq oqıǵa bolatyn Dúnıejúzilik kóshpendiler oıyndaryynyń aqparattyq seriktesi bolý týraly bastama kóterdi.
