Astanada Eýrazııalyq kitap kórme-jármeńkesi ótedi
ASTANA. QazAqparat - Astanada 25-28 sáýir aralyǵynda úshinshi Eýrazııalyq «Eurasian Book Fair» halyqaralyq kitap kórme-jármeńkesi ótedi. Atalmysh shara «Kórme» zalynda jumys isteıdi. Bul týraly Ortalyq kommýnıkatsııalar qyzmetinde kórmeniń tanystyrylymyna arnalǵan baspasóz maslıhatynda aıtyldy.
«Búgingi tańda kórmege qatysýǵa 18 elden 150 kompanııa men uıymdar ótinish berdi. Sonyń ishinde Reseı, Polsha, Ulybrıtanııa, Belarýs, Ázerbaıjan, Tájikstan, Túrkııa, Qytaı, Úndistan, Albanııa jáne basqa da memleketter bar. Qazaqstandyq baspalardan bólek qatysýshylardyń basym bóligi Reseı jaǵynan bolyp otyr - ıaǵnı 41 qatysýshy», - dep málimdedi «Eýrazııa halyqaralyq kitap kórme-jármeńkesi» jobasynyń basshysy Raýshan Turlynova.
Aıta ketsek, 2018 jyly qatysýshylar is júzinde eki esege kóbeıgen. Ótken jyly kitap forýmyna 14 elden 80 eksponent qatysqan bolatyn. Al sharanyń uıymdastyrýshysy - «Folıant» baspasy.
Bul kórme-jármeńke qazaqstandyq oqyrmandar úshin naǵyz kitap merekesi bolmaq. Kelýshilerdi Qanat Tasıbekovpen, Seıdahmet Quttyqadammen, Reseı prozaıkteri Lev Danılkınmen, Valerıı Popovpen jáne basqa da tanymal jazýshylar, aqyndar jáne mádenı qaıratkerlermen kezdesý kútip tur.
«Kórme aıasynda Astanada alǵash ret «Poetıcheskıı SLEM» atty jas aqyndardyń beıresmı jyr saıysy, kórermender aldynda ózderiniń kitaptardan jasalǵan týyndysyn kórsetetin art-dızaınerler baıqaýy, kitap ıllıýstratsııasyna arnalǵan arnaıy sharalar ótedi. Mektep oqýshylary men jas qatysýshylar úshin biz arnaıy jeke oryn ázirledik, belgili qazaqstandyq jazýshy Lılı Kalaýs pen reseılik jazýshy, stsenarıst, dramatýrg Evgenıı Dekınmen birge «Kitapty qalaı jazý kerek?» dep atalatyn sheberlik synyby uıymdastyrylady», - deıdi kórme jobasynyń jetekshisi.
«Eurasian Book Fair» - eýrazııalyq halyqaralyq kitap kórme-jármeńkesi elimizdegi - iskerlik jáne gýmanıtarlyq áriptestikti damytý jáne nyǵaıtý maqsatynda TMD, Eýropa jáne Azııa elderiniń baspa, kitap saýdasy uıymdaryn, mádenı jáne bilim berý ortalyqtaryn úlken ıntellektýaldyq alańǵa biriktiretin asa iri kitap forýmy.
Illıýstratsııalyq foto
