Astanada Eýrazııalyq bank fılıalynyń burynǵy basshysyna sot úkim shyǵardy
ASTANA. QazAqparat - Eýrazııalyq bank fılıalynyń burynǵy basshysyna sot úkim shyǵardy, dep habarlaıdy Astana qalalyq sotynyń resmı saıty.
«2017 jylǵy 14 jeltoqsanda sot «Eýrazııalyq bank» AQ-nyń №5 fılıalynyń burynǵy dırektory M.S. Muqanovqa jáne sol fılıaldyń kassa meńgerýshisi A.E. Meńdalıevaǵa qatysty qylmystyq is boıynsha úkim oqydy. Olar iri mólsherdegi qarjyny jumsap jiberý jolymen «Eýrazııalyq bank» AQ-ǵa 5 mln 939 AQSh dollary kóleminde materıaldyq zalal keltirgen», - delingen habarlamada.
Budan tys, Muqanov bótenniń múlkine qasaqana órt qoıý jolymen aktsıonerlik qoǵamǵa asa iri kólemde zııan keltirgen.
Esil aýdandyq №2 sotynyń úkimimen Muqanov QR Qylmystyq kodeksiniń 189-babynyń 4-bóliginiń 2-tarmaǵy, 202-babynyń 3-bóliginiń 2-tarmaǵy boıynsha aıypty dep tanylyp, 10 jylǵa bas bostandyǵynan aıyrý, qarjy-bank salasynda 7 jyl merzimde laýazym ıelený quqyǵynan aıyrý jazasyna kesildi. Ol jazany ortasha qaýipsizdik qylmystyq-atqarý júıesi mekemesinde óteıtin bolady.
Meńdalıeva sot úkimimen QR Qylmystyq kodeksiniń 28-babynyń 5-bóligi, 189-babynyń 4-bóliginiń 2-tarmaǵy boıynsha aıypty dep tanylyp, 7 jylǵa bas bostandyǵynan aıyrý, qarjy-bank salasynda 5 jyl merzimde laýazym ıelený quqyǵynan aıyrý jazasyna kesildi. Ol jazany ortasha qaýipsizdik qylmystyq-atqarý júıesi mekemesinde óteıtin bolady.
Úkim zańdy kúshine engen joq.
