Astanada Eýrazııadaǵy memlekettik basqarýdyń zamanaýı úrdisteri talqylandy
ASTANA. QazAqparat - Nazarbaev Ýnıversıteti Joǵary memlekettik saıasat mektebi men Astana memlekettik qyzmet haby «Postkeńestik Eýrazııadaǵy memlekettik basqarýdyń zamanaýı máseleleri» taqyrybynda konferentsııa ótkizdi.
Konferentsııaǵa 30-dan astam eldiń, sonyń ishinde, Qazaqstan, Qyrǵyzstan, Ózbekstan, Reseı, Ýkraına, Grýzııa, Vengrııa, Sıngapýr, Qytaı, Nıderlandy, Malaızııa, Úndistan, Aýstralııa jáne ózge de elderdiń zertteýshileri, sarapshylary jáne memlekettik qyzmetshileri qatysty, dep jazady egemen.kz.
Alqaly jıyndy ashqan Astana memlekettik qyzmet haby Basqarýshy komıtetiniń tóraǵasy Alıhan Baımenov: «Bizdiń óńir elderi áleýmettik-ekonomıkalyq reformalardyń biregeı jolyn memleket rólin transformatsııalaý jáne memlekettik qyzmettiń ózindik modelderin damytýmen qatar ótti. Ótken joldy oı eleginen ótkizý, jetistikter men máselelerdi taldaý ǵalymdar úshin de, memlekettik qyzmetshiler úshinde mańyzdy», - dep atap ótti.
Óz kezeginde sóz alǵan NÝ JMSM dekany Ven Tat Hýeıdiń aıtýynsha, konferentsııa 30-dan astam eldiń zertteýshileri men is-tájirıbeden ótýshileriniń basyn qosqan. «Olar bir-birimen memlekettik basqarý salasynda bilim men tájirıbe almasyp, bir-birinen úırený múmkindigine ıe boldy. Nátıjesinde, postkeńestik Eýrazııa elderiniń kóshbasshylaryna arnalǵan dáleldi saıasat qabyldanady dep senemin»», -deıdi ol. Konferentsııanyń ashylý saltanatynda Ortalyq jáne Shyǵys Eýropadaǵy memlekettik basqarý mektepteri men ınstıtýttar jelisiniń Prezıdenti Georgıı Hadjnalda quttyqtaý sóz sóıledi. Konferentsııa aıasynda memlekettik menedjment, memlekettik qyzmetti reformalaý, úkimet, bıznes jáne azamattyq qoǵam arasyndaǵy ózara árekettestik jáne basqa da taqyryptar boıynsha sessııalar ótkizilip, onda 60-tan astam baıandama jasaldy. Konferentsııaǵa qatysýshylar óz zertteýleriniń nátıjelerimen bólisip, bilimin jáne tájirıbesin almasyp, áriptestik baılanystaryn keńeıtti.
Aıta ketken jón,Memlekettik saıasat jáne basqarý máseleleri jónindegi halyqaralyq konferentsııa ekinshi ret ótkizilip otyr. Osy jyly bas uıymdastyrýshylarmen qatar, Lı Kýan ıÝ memlekettik saıasat mektebi, Brıtan akademııasy jáne Olster ýnıversıteti de qoldaý kórsetti.
