Astanada «Eýrazııa: Mádenıetter jáne urpaqtar dıalogi» atty halyqaralyq forým jumysy ótedi
ASTANA. Sáýirdiń 27-si. QazAqparat /Jasulan Amanbaıuly/ - Erteń, Astanada «Eýrazııa: Mádenıetter jáne urpaqtar dıalogi» atty halyqaralyq forým óz jumysyn bastaıdy.
Bul týraly búgin sharanyń uıymdastyrýyna uıytqy bolyp otyrǵan halyqaralyq Dıalog Eýrazııa platformasy uıymynyń tóraǵasy Nurlan Orazalın málim etti, dep habarlaıdy QazAqparat.
Forýmǵa Túrkııa, Reseı, Moldova, Belarýs, Ýkraına, Túrikmenstan, Tájikstan, Úndistan sekildi, barlyǵy 16 memleketten delegattar kelip qatyspaq. Sonymen qatar QR Parlamenti Senatynyń spıkeri Qasym-Jomart Toqaev, QR Premer-Mınıstri Kárim Másimov, QR Mádenıet mınıstri Muhtar Qul-Muhammed, QR Bilim jáne ǵylym mınıstri Janseıit Túımebaev bolady dep kútilýde.
Uıym otyrysynda ulttar, memleketter, dinder arasyndaǵy tatýlyq taqyryby, urpaqtar sabaqtastyǵy talqylanady. Platformanyń elimizdegi ulttyq komıtetiniń tóraǵasy, senator Ǵarıfolla Esimniń aıtýynsha, alqaly jıynda Qyrǵyz Respýblıkasyndaǵy oqıǵalar, Máskeýdegi terrorlyq aktiler syndy naqty ǵalamdyq taqyryptar da kóteriledi.
Dıalog Eýrazııa platformasy osydan 12 jyl buryn Ystambul qalasynda qurylǵan bolatyn. Onyń tusaýyn kesýge Eýrazııa keńistigindegi 10-nan astam memlekettiń qatarynda Qazaqstan da atsalysqan edi. Onyń basy-qasynda Oljas Súleımenov, Muhtar Shahanov, Sherhan Murtaza, Ábish Kekilbaev sekildi azamattar boldy. Qazir bul uıymǵa eki jyldan beri Qazaqstan tóraǵalyq etip júr.
«Uıymnyń maqsaty - elderdiń, qurylyqtardyń arasyndaǵy órshı bastaǵan alaýyzdyq bolatyn bolsa, sony halyqtyq demokratııalyq úlgide memleketter arasyna dáneker bola otyryp, ony toqtatý. Osyndaı kisilikti, adamgeshilikti ıdeıalardy tý etken platforma qanatyn keńge jaıyp, qazir 16 memlekette óziniń ulttyq komıtetterin qurǵan», deıdi N. Orazalın.
