Astanada Eýrazııa qalamgerleri qazirgi zamanǵy ádebıettiń máselelerin talqylaıdy

ASTANA. QazAqparat - Astanada 20-21 qyrkúıek aralyǵynda «Qazirgi zamanǵy sóz energııasy» atty Eýrazııalyq ádebı forým ótkiziledi, dep habarlaıdy QazAqparat Qazaqstan Jazýshylar odaǵyna silteme jasap.

Sharany Qazaqstan Jazýshylar odaǵy basqarmasy QR Mádenıet jáne sport mınıstrliginiń qoldaýymen Elbasynyń «Rýhanı jańǵyrý» baǵdarlamasy aıasynda uıymdastyrady. Forým Elordasy -Astananyń 20 jyldyǵyna arnalady. 

Basqosýǵa Eýrazııanyń túkpir-túkpirinen shet el qalamgerleri qatysady. Dál osyndaı aýqymdy forým 1973 jyldan beri araǵa 45 jyl salyp Astana qalasynda ótedi.
20 qyrkúıekte Táýelsizdik Saraıynda forýmnyń saltanatty ashylý rásimi men «Zamanaýı Eýrazııalyq ádebıet» kitap kórmesi jáne «Ádebıet jáne jahandyq máseleler» men «Aımaqtyq ádebıetterdiń damýy» atty eki bólimnen turatyn plenarlyq otyrys ótedi. 
21 qyrkúıekte «Hilton Garden Inn Astana» qonaq úıinde 4 sektsııa boıynsha: «Jańa zaman poezııasy: kóteretin negizgi taqyryptar men máseleler», «Jańa zaman prozasy: kóteretin negizgi taqyryptar men máseleler», «Dramatýrgııanyń ózekti máseleleri», «Qazirgi zamanǵy aýdarma isiniń hal-ahýaly» taqyryptarynda basqosýlar ótedi. 
Ádebı forým aıasynda Qazaqstan Jazýshylar odaǵy men Iran Jazýshylar Qaýymdastyǵy arasynda yntymaqtastyq memorandýmǵa qol qoıylady. Sondaı-aq, QR Ulttyq Akademııaly kitaphanasynda Qazaqstan -Reseı qalamgerleriniń kezdesýi ótedi.