Astanada Eýrazııa halyqaralyq kitap kórmesi ótip jatyr
«Folıant» baspasynyń uıymdastyrýymen búgin bastalǵan ІІІ Eýrazııa halyqaralyq «Eurasian Book Fair-2018» kitap kórme-jármeńkesi 28 səýirge deıin jalǵasady. Kórme alańynda Reseı, Polsha, Ulybrıtanııa, Belarýssııa, Ázerbaıjan, Tájikstan, Túrkııa, Qytaı, Úndistan, Albanııa jáne basqa memleketterdiń baspalary óz ónimderin usynýda.
«Jahandaný jáne tsıfrlyq tehnologııalar ǵasyrynda kitap burynǵysha jańa bilimniń qaınar kózi bolyp qala beredi. Ol búkil bolmysty tanyp-bilýdiń ǵalamat quraly bolyp tabylady», - dep atap ótti Qazaqstan Respýblıkasynyń Memlekettik hatshysy Gúlshara Ábdihalyqova kórmeniń ashylýynda.
Memlekettik hatshy elde saıası, ekonomıkalyq jáne rýhanı ózgerister júıeli túrde júrip, «Rýhanı jańǵyrý» baǵdarlamasy iske asyrylyp jatqanyn eske saldy.
«Osyndaı jaqsylyqtar tusynda kitap sekildi qazynaly qordyń erekshe oryn alatyny daýsyz. Kitapsúıer ult, ol - naǵyz zııatkerlik sanasy jetilgen ult», - dedi Gúlshara Ábdihalyqova.
Bıyl Qazaqstanda Ózbekstan jyly jarııalanǵandyqtan, ózbek baspalaryna, kitap shyǵarý kompanııalaryna aıryqsha kóńil bólinýde.
«Kórme arqyly mádenı, iskerlik baılanystar nyǵaıyp, álem boıynsha kitap ındýstrııasyn zerdeleýge múmkindik týady. Kitaptyń, sózsiz, bilimniń qaınar kózi ekeni anyq. Kitap óneri jasaı bersin!», - dedi Ózbek baspa isi jáne aqparat agenttigi dırektorynyń birinshi orynbasary Sabyr Shúkirov.
Al Reseı kitap shyǵarýshylar qaýymdastyǵynyń prezıdenti Konstantın Chechenev, kórmede alǵash ret Máskeý úkimetiniń jeke orny qarastyrylǵanyn jetkizdi.
Qazaqstandyq oqyrman qaýym úshin, kórme-jármeńke mereke ispetti ekeni daýsyz. Qonaqtardy jańa kitaptar saýdasynan bólek, aqyn-jazýshylarmen, mádenıet qaıratkerlerimen shyǵarmashylyq kezdesýler kútip tur. Búgingi kúnniń ódinde kórme aıasynda aqyn-jazýshylardyń birneshe jıyny ótip, birsypyra kitaptardyń tusaýy kesildi.
Kórme aıasynda Astanada tuńǵysh ret, jas aqyndar saıysy, sýretshiler jarysy, balalarǵa qyzyqty oıyndar, ózge de túrli qyzyqty sharalar ótedi.
