Astanada «Eýrazııa» birinshi telearnasynyń qyzmetkeri jol apatynan kóz jumdy
ASTANA. QazAqparat - Jaqyn kúnderi elordada túngi ýaqytta oryn alǵan jol apatynan Eýrazııa birinshi arnasy telearnasynyń aparattyq-stýdııalyq blogynyń basshysy Anatolıı Parfenov kóz jumdy. Kýágerlerdiń aıtýynsha, onyń ólimine djıp júrgizýshisi sebepker bolǵan, dep habarlaıdy telearnadan.
Qarama-qarsy jolaqtaǵy «Honda Pilot» markaly djıpiniń júrgizýshisi bolǵan jas jigit (shamamen 21 jasta) jol erejesin buzyp, burylǵanda jol berýdiń ornyna Anatolııdiń mototsıklin qaǵyp ketken. Soqqynyń qatty bolǵany sondaı, onyń shaǵyn kóligi qaqqa aıyrylǵan. Polıtsııa qyzmetkerleri ázirge buǵan qatysty esh málimet bermeı otyr. Tipti, djıp júrgizýshisiniń aty-jónin de atamady.
Anatolııdiń anasynyń aıtýynsha, aýrýhanaǵa jetkizilgende ulynyń qol-aıaǵy, jambasy synǵany anyqtalǵan. Árdaıym kóńildi júretin ári jaýapty qyzmetker bola bilgen Anatolıı dostarymen birge jaqynda Reseıde ótetin motofestıvalge barmaqqa jınalyp júrgen. Ol óziniń týǵan kúnine, ıaǵnı 28 jasqa tolýyna nebári bir aı qalǵanda ajal qushty. Djıp kóligi men mototsıklge qatysty jol apatyna baılanysty qylmystyq is qozǵaldy.
