Astanada «Etnosaıası sózdiktiń» tusaýy kesildi (FOTO)

ASTANA. QazAqparat - Búgin Qazaqstan Respýblıkasynyń Ulttyq akademııalyq kitaphanasynda Qazaqstan halqy Assambleıasynyń Ǵylymı-saraptamalyq keńesi QR Mádenıet jáne sport mınıstrliginiń qoldaýymen baspaǵa daıyndaǵan «Etnosaıası sózdiktiń» tusaýkeseri ótti.

«Biz búginde eski ǵylymı ádistemeden jańa zamanaýı dáýirge óttik dep aıtýǵa bolady. Degenmen, ázirge árbir túsinik pen sanattardy árkim árqalaı túsinip ári túsindirip júr. Bul turǵyda keıbireýler keńestik ádistemeni alǵa tartsa, endi bireýler batystyq standarttarǵa júginedi. Bulardyń ekeýi de qazirgi qazaqstandyq qoǵamǵa kele bermeıdi. Osy jáne basqa da sebepterdi eskere otyryp, biz, ıaǵnı sózdiktiń avtorlar ujymy, qazirgi qoǵamnyń shynaı bet-beınesin naqty kórsete alatyn etnosaıası termınderdi zamanaýı ádistememen túsindirýge tyrystyq», - deıdi «Etnosaıası sózdik» jobasynyń ǵylymı jetekshisi, áleýmettaný ǵylymdarynyń doktory Aıgúl Sádýaqasova.

Onyń aıtýynsha, sózdikti jasaýǵa ártúrli saladan 10 shaqty ǵylym doktory qatysqan.

«Jobany jasaýǵa fılolog, áleýmettanýshy, tarıhshy, saıasattanýshy, zańger sııaqty 10 shaqty ǵylym doktorlary qatysty. Túrli máselelerdi ár qyrynan qarýǵa tyrystyq. Nátıjesinde, sózdikke 200 sóz qazaq tilinde, taǵy 200 sóz orys tilinde engizilip, jan-jaqty talqylandy. Sondaı-aq, sózdikke elimizdegi ıýarlyq etnostar týraly qysqasha anyqtamalyq engizilip, olardyń sany, qaıda turatyny, tili, dini týraly tolyq málimetter berildi», - deıdi ǵalym.

Atalǵan eńbek gýmanıtarlyq ǵylym mamandaryna, ǵalymdar men sarapshylarǵa, memleýettik qyzmetkerlerge jáne etnosaralyq qarym-qatynas salasyna qyzyǵýshylyq tanytatyn barlyq oqyrmandarǵa arnalǵan.

Aıta keteıik, shara barysynla QHA ǴSK músheleri men QR Prezıdenti janyndaǵy «Qoǵamdyq kelisim» RMM qyzmetkerleriniń ǵylymı eńbekteri QR Ulttyq akademııalyq kitaphanasyndaǵy QHA Depozıtarııine saltanatty túrde tabystaldy.