Astanada etnomádenı birlestikterdiń ashyq esik kúnderi aıaqtaldy

ASTANA. QazAqparat - Qazaqstan halqy Assambleıasy jylyna oraı Astana qalasynda 1-7 naýryz aralyǵynda qalalyq etnomádenı birlestikterdiń ashyq esik kúnderi ótti. Shara aıasynda birlestikter ulttyq buıymdar kórmesin, shyǵarmashylyq kontsertter men sheberlik saǵattaryn uıymdastyrdy, dep habarlady astana.gov.kz.

Ashyq esik kúnderi baǵdarlamasy aıasynda barlyq qatysýshylar Qazaqstan halqy Assambleıasynyń qyzmeti, maqsaty týraly tolyq málimet aldy. Tatar-bashqurt, sheshen-ıngýsh, evreı, qyrǵyz etnomádenı birlestikterinde qonaqtarmen kezdesýler ótkizildi, óz uıymdarynyń jumysymen tanystyrdy.

Sonymen qatar, Beıbitshilik jáne kelisim saraıynda etnomádenı birlestikterdiń keńselerine ekskýrsııalar, ulttyq án men bıdi nasıhattaıtyn kontsert jáne qoldanbaly óner kórmesi uıymdastyryldy.

Naýryzdyń 4 kúni polıak, armıan, ázerbaıjan, túrik etnomádenı birlestikterinde «Stokrotka», «Naırı», «Hazar» ujymdarynyń qatysýymen ótken merekelik kontsertter kóptiń kóńilinen shyqty. Belarýs, ózbek, grýzın ortalyqtarynyń, «Obereg» ýkraın ortalyǵymen jáne respýblıkalyq «Lad» slavıandar qozǵylysynyń uıymdastyrýymen halyqtyq qoldanbaly óner boıynsha arnaıy kórme-tanystyrylym, al 6 naýryzda bolgar, túrikmen, kúrd etnomádenı birlestikteriniń ulttyq kıimder kórmesi ótti.