Astanada etnoaýyldaǵy tazy ıtteriniń ıesine aıyppul salyndy
ASTANA. QazAqparat - Astanada ábden ashyqqan jáne álsiregen tazy ıtteriniń ıesine aıyppul salyndy. Bul týraly QazAqparat tilshisine Qalalyq orta sapasy jáne baqylaý basqarmasynan málim etti.
Basqarmanyń Veterınarııa jáne ósimdikterdi qorǵaý bóliminiń mamandary Astana polıtsııasymen birlesip, janýarlardyń ıesine túsindirý jumystaryn júrgizgen jáne veterınarlyq-sanıtarlyq talaptardy saqtaýdy eskertken.
Astana qalalyq máslıhatynyń 2015 jyldyń 23 jeltoqsanynda bekitilgen sheshimimen Qala aýmaǵynda janýardy asyraý men kútip-baǵý erejesin buzǵany úshin Astana ІІD Jergilikti polıtsııa qyzmeti janýarlardyń ıesin QR ÁQBK 408-baby, 1-bóligi boıynsha ákimshilik jaýapkershilikke tartyp, 3 AEK kóleminde aıyppul saldy.
Al janýarlarǵa qatygezdik jasaý faktisi rastalǵan joq.
Eske salaıyq, tamyz aıynda Feısbýk qoldanýshysy Jora Morozov «Etnoaýyl» ulttyq-mádenı ortalyǵy («Qazanat» ıppodromy) aýmaǵyndaǵy eki tazynyń múshkil jaǵdaıy týraly dabyl qaqqan bolatyn. Keıinirek bul janýarlardyń jeke tulǵaǵa tıesili ekeni anyqtaldy.
QR Mádenıet jáne sport mınıstri Arystanbek Muhamedıuly ábden azǵan ıtterge qatysty máseleni óz baqylaýyna alatynyn aıtqan bolatyn.
«Eki ıttiń de ıesi - Bekbolat esimdi jeke tulǵa, olardy Pavlodardan ákelipti. Onyń aıtýynsha, biraz ýaqyt buryn eki ıt qorshaýdan joǵalyp ketip, 10 kún izdestirýden keıin óte nashar jaǵdaıda qaıtarylypty. Itter joǵalǵany týraly polıtsııaǵa bergen aryzy bar», - dedi mınıstr.
