Astanada et óńdeıtin jasyryn tseh anyqtaldy
ASTANA. KAZINFORM – Astanada respýblıkalyq «Mal urlyǵy» jedel-profılaktıkalyq is-sharasy aıasynda aýyl sharýashylyǵy janýarlaryn óńdeý jáne músheleýmen aınalysqan zańsyz tseh anyqtaldy.
QR Aýyl sharýashylyǵy mınıstrligi Veterınarııalyq baqylaý jáne qadaǵalaý komıtetiniń Astana qalasy boıynsha aýmaqtyq ınspektsııasynyń málimetinshe, atalǵan nysanda 2-sanattaǵy obektilerge qoıylatyn talaptarǵa sáıkes qajetti ruqsat qujattarynsyz et ónimderi óńdelgen. Atap aıtqanda, veterınarııalyq-sanıtarııalyq qorytyndy men eseptik nómir bolmaǵan.
Anyqtalǵan derek boıynsha memlekettik veterınarııalyq-sanıtarııalyq ınspektorlar qoı etinen synamalar alynyp, zertteý júrgizý úshin «Respýblıkalyq veterınarııalyq zerthana» sharýashylyq júrgizý quqyǵyndaǵy respýblıkalyq memlekettik kásipornynyń Astana qalasyndaǵy óńirlik fılıalyna joldandy.
Quqyq buzýshylyqqa kináli tulǵaǵa ákimshilik aıyppul salyndy.
Shyǵý tegi belgisiz iri jáne usaq qara maldyń jalpy salmaǵy 360 keli bolatyn ishki aǵzalary men qosalqy ónimderi «Astana-Vetservıs» sharýashylyq júrgizý quqyǵyndaǵy kommýnaldyq memlekettik kásipornynyń pesh-ınsıneratorynda órteý arqyly joıyldy.
Bul baǵyttaǵy jumystar jalǵasyp jatyr.
Aıta keteıik, otandyq ǵalymdar et arqyly juǵýy múmkin trıhınellez aýrýyn jedel anyqtaıtyn test júıesin ázirlep jatyr. Jańa ádis zerthanalyq mıkroskopııalyq zertteýge ketetin ýaqytty qysqartyp, nátıjeni 15–20 mınýtta alýǵa múmkindik beredi.
