Astanada estý qabiletin jaqsartatyn mektep ashyldy
ASTANA. QazAqparat - № 2 qalalyq emhananyń bazasynda estý jáne sóıleý qabileti buzylǵan balalardyń ata-analaryna arnalǵan mektep ashyldy, dep habarlaıdy QazAqparat Astana ákimdiginiń resmı saıtyna silteme jasap.
Dárigerler estý qabiletiniń nasharlaýynyń aldyn alýǵa sanıtarlyq-aǵartý jumysyn júrgizýdi josparlaýda. Munda estý jáne sóıleý qabileti buzylǵan balalardyń ata-analarymen áńgime júrgiziletin bolady.
«Men estý qabileti buzylǵan balalardyń ata-anasymen baılanys ornatqym keldi. Odardyń jalǵyz emestigin kórsetip, máselelerin sheshýge bolatynyn kórsetkim keldi. Keı balalardyń estý qabiletiniń nasharlyǵy der kezinde anyqtalsa, emdeýge bolady. Sabaqty aıyna eki ret ótkizý josparlanýda», - dedi №2 qalalyq balalar aýrýhanasynyń sýrdolog dárigeri Ásel Qudaıbergenova.
Estý qabiletin nasharlatatyn aýrýdyń keıbir túrleri patsıentte ómir boıy bolady, sol sebepti bilimdi tolyqtyryp otyrý qajet. Dárigerdiń aıtýynsha, estý jáne sóıleýdiń qazirgi zamandaǵy dıagnostıkasy men emi, túzeý jáne ońaltýdyń arqasynda balanyń damýy óziniń qurby-qurdastarynan kem bolmaıdy.
Ásel Qudaıbergenovanyń aıtýynsha, ınternetten oqyp alyp nemese halyqtyq ádistermen em qabyldaýdyń qajeti joq. Balanyń estý jáne sóıleýiniń nasharlyǵyn der kezinde anyqtap, durys em qabyldamaý balanyń damýyna keri áserin tıgizedi. Tek kásibı maman ǵana durys dıagnoz qoıa alady. Al qazirgi zamanǵy medıtsına kemshilikti erte kezden anyqtap, durys em belgileýge múmkindik beredi.
