Astanada esirtki taratýmen aınalysqan uıymdasqan toptyń músheleri sottaldy
ASTANA. KAZINFORM — Astanada esirtkini zańsyz saqtaý, tasymaldaý jáne taratýmen baılanysty qylmystyq is boıynsha sot úkimi shyqty.
Polıtseıler bir jyl boıy júrgizgen jedel-izdestirý is-sharalarynyń nátıjesinde ınternet-dúken arqyly tyıym salynǵan zattardy taratýmen aınalysqan uıymdasqan toptyń qyzmeti toqtatyldy.
— Tergeý barysynda qylmystyq shemanyń alty negizgi qatysýshysy anyqtaldy. Olardyń qatarynda ınternet-dúkendi uıymdastyrýshy, esirtki zattaryn saqtaýǵa jaýapty tulǵalar, olardy taratqan kýrerler, sondaı-aq qylmystyq jolmen alynǵan qarajatty qolma-qol aqshaǵa aınaldyrýǵa qatysy bar adamdar bolǵan, — dep habarlady Іshki ister mınıstrligi.
Polıtsııa qyzmetkerleri top múshelerin ustaý boıynsha is-sharalar júrgizip, esirtki zattarynyń iri partııalaryn tárkiledi. Tergeý amaldary kezinde qylmystyq áreketke qatysy bar barlyq tulǵa anyqtalyp, olardyń uıymdasqan qylmystyq qyzmettegi róli dáleldendi.
Qylmystyq isti qaraý qorytyndysy boıynsha sot sottalýshylardy kináli dep tanydy. Top músheleriniń árqaısysyna 15 jyldan 17 jylǵa deıin bas bostandyǵynan aıyrý jazasy taǵaıyndaldy.
Eske salaıyq, buǵan deıin Jetisý oblysynda esirtki ótkizýmen aınalysqan uıymdasqan toptyń qyzmeti toqtatylǵanyn habarlaǵanbyz.
