Astanada esirtki taratýǵa qatysy bar saıttar buǵattaldy
ASTANA. KAZINFORM – Jyl basynan beri Astanada 2 myńnan astam esirtki satýǵa arnalǵan ınternet-resýrstar buǵattaýǵa jiberilip, esirtki qylmysyna qarsy kúres kúsheıtildi. Bul týraly Astana qalasy polıtsııa departamentiniń Esirtki qylmysyna qarsy is-qımyl basqarmasynyń bastyǵy Maqsat Ábiken qalalyq máslıhattyń turaqty komıssııa otyrysynda málim etti.
– Astanadaǵy esirtki ahýalyna kelsek, qazirgi jaǵdaıda esirtkiniń 90 paıyzy baılanyssyz (onlaın) tásilmen satylady. Sondyqtan biz esirtki qylmysyna qarsy is-qımyl tásilderin ózgertip, ınternet arqyly satylatyn arnalardy anyqtaý men jolyn kesýge basymdyq berip otyrmyz. 2 229 ınternet-resýrs buǵattaýǵa jiberildi, olardyń basym bóligi jastar arasynda tanymal. Sondaı-aq kúdikti operatsııalar boıynsha 2 783 bank kartasy buǵattaldy, jalpy somasy 113 mıllıon teńgeni qurady. Esirtki bıznesi salasynda úsh uıymdasqan qylmystyq toptyń jáne bir narkolaboratorııanyń qyzmeti toqtatyldy. 1 106 esirtki quqyqbuzýshylyǵy anyqtaldy, onyń ishinde 412-si – satý faktileri. Tárkilengen esirtki kólemi ótken jylmen salystyrǵanda 342 kılogramnan 465 kılogramǵa deıin artty, onyń ishinde sıntetıkalyq esirtki 22 kılogramnan 45 kılogramǵa deıin kóbeıdi, – dedi vedomstvo ókili.
Spıkerdiń aıtýynsha, quramynda esirtki jáne psıhoaktıvti zattardy zańsyz satý resýrstaryna siltemeler bar esirtki saýdasyn nasıhattaıtyn jazbalar joıý boıynsha júıeli jumys jalǵasyp jatyr. Osy baǵytta Qylmystyq kodekstiń 299-1-baby boıynsha 15 qylmystyq is qozǵalǵan. 2 500-den astam narkograffıtı óshirilgen.
Sondaı-aq Maqsat Ábiken jyl basynan beri oıyn-saýyq oryndarynda birqatar reıdtik is-sharalar júrgizilgenin atap ótti. Nátıjesinde Qylmystyq kodekstiń 301-baby boıynsha «kúldirgish gazdy» zańsyz paıdalaný faktileri boıynsha 20 qylmystyq is qozǵalyp, zańsyz aınalymnan 70-ten astam ballon tárkilengen.
Onyń aıtýynsha, qazirgi ýaqytta 2026–2028 jyldarǵa arnalǵan «Astana – esirtkisiz qala» jospary ázirlengen. Qujat esirtki quqyqbuzýshylyqtarynyń aldyn alýǵa baǵyttalǵan is-sharalardy, sonyń ishinde lektsııalar, semınarlar jáne ózge de profılaktıkalyq jumystardy qamtıdy.
Eske sala keteıik, ІІM jyl basynan beri shamamen úsh tonna esirtkiniń aınalymǵa shyǵýyna tosqaýyl qoıdy.