Astanada esirtki taratqan qyz 10 jylǵa sottaldy
ASTANA. KAZINFORM – Aqmola oblysynda týǵan, Astanada ósken qyzdyń taǵdyry nashar orta men nashaqorlyqqa baılanysty kúrt ózgerdi. Bul týraly Qylmystyq atqarý júıesi komıteti habarlady.
Ol esirtki taratqany úshin 10 jylǵa bas bostandyǵynan aıyryldy.
Qyzdyń aıtýynsha, bári kolledjge túsken kezde bastalǵan.
— Men bir qyzben tanystym. Ol jıi qydyratyn. Birde páterde ótken keshke shaqyrdy. Barsam, jastar, ishimdik, ústelde aq untaq tur. Maǵan da usyndy. Qoryqtym. Biraq «bári jaqsy bolady» dep sendirdi. Qyzyǵýshylyqpen baıqap kórdim, — deıdi ol.
Sodan bastap qyz birneshe aı boıy esirtki qoldanǵan. Alǵashqyda dosy ákelip júrgen, keıin ózi ınternet arqyly izdep tapqan. Ýaqyt óte kele aqsha jetpeı, kýrer bolyp, «qaltasha» arqyly esirtki taratýmen aınalysqan.
Kóp uzamaı onyń qylmystyq áreketi áshkere boldy. Úıinen 53 gramm, qaltasynan 10 gramm esirtki tabylyp, óz podezinde ustaldy. Tergeý kezinde kinásin moıyndap, isti jeńildetetin jaıttarǵa qaramastan, sot ony 10 jylǵa bas bostandyǵynan aıyrý jazasyna kesti.
— Týystarym qatty renjidi. Ásirese, ápkemniń qyzy jylady. Sol sátte bárin túsindim. Aqshanyń bári túkke turmaıdy, eger ishki jan-dúnıeń bos bolsa. Qazir ár kún ózimdi kinálap, qatty ókinemin. Narkotık — táýeldilik. Jaqyndaryńdy oılaý kerek edi. Al men olardy kórýden de qaldym, — deıdi ol.
Qazirgi ýaqytta jazasyn № 32 túzetý mekemesinde ótep jatqan qyz bilimin jalǵastyryp, jańa ómir bastaýǵa nıetti ekenin jetkizdi.
Aıta keteıik, Almatyda AQSh-tan poshta arqyly kelgen esirtki tárkilendi.