Astanada esirtki óndiretin jasyryn zerthana joıyldy
ASTANA. KAZINFORM – Astanada sıntetıkalyq esirtki óndiretin jasyryn zerthana joıyldy, dep habarlaıdy QR Ulttyq qaýipsizdik komıtetiniń baspasóz qyzmeti.
Baspasóz qyzmetiniń málimetterine qaraǵanda, qalanyń ónerkásip aımaǵynda ornalasqan zerthanany joıý jumystary QR Ulttyq qaýpsizdik komıteti qalalyq departamenti prokýratýranyń úılestirýmen júzege asyrylǵan.
Osy qylmystyq quqyq buzýshylyqty jasady degen kúdikpen astananyń 2 turǵyny ustaldy. Tintý barysynda olardan shamamen 80 myń bir rettik dozaǵa bara-bar 27 kg-dan astam «mefedron» psıhotroptyq zaty, sondaı-aq 1 tonnadan artyq prekýrsor alyndy. Alynǵan esirtki quny «qara naryqta» 540 mln teńgege baǵalanady.
Budan basqa, Astana qalasynyń basqa aýdandarynda zerthana jabdyǵy bar 40 fýttyq eki konteıner tabyldy, tergeý nusqasy boıynsha, olar birneshe osyǵan uqsas óndiristi uıymdastyrýǵa arnalǵan.
«Qylmystyq kodekstiń 297-baby 3-bóligi boıynsha sotqa deıingi tergep-tekserý júrgizilýde. Ózge aqparat Qylmystyq-protsestik kodekstiń 201-baby 1-bóligine sáıkes jarııa etilmeıdi», -delingen UQK baspasóz qyzmeti taratqan baspasóz-baıanynda.
