Astanada esirtki satatyn ınternet-dúken «qoımasynan» 2 myńnan astam túıinshek tárkilendi
ASTANA. KAZINFORM — Astanada polıtsııa esirtki zattaryn saqtap, taratýmen aınalysqan ınternet-dúkenniń «qoımasyn» anyqtady. Kúdikke ilikken 33 jastaǵy er adam ustaldy.
Polıtsııa qyzmetkerleri kúdiktini jeke tintý kezinde onyń bel sómkesinen marıhýana salynǵan túıinshekter tapqan. Keıin onyń páterin tintý barysynda túrli tústi ızolentamen oralǵan, quramynda uqsas zat bar 2 myńnan astam túıinshek anyqtaldy.
— Páterden suıyq zat quıylǵan tútiksheler tárkilengen. Saraptama nátıjesinde olardyń quramyndaǵy zattyń gashısh maıy ekeni anyqtaldy, — delingen habarlamada.
Tárkilengen esirtki zattarynyń jalpy salmaǵy 2 keliden asty.
Tergeý barysynda er adamnyń messendjerler arqyly tyıym salynǵan zattardy satatyn ınternet-dúkenge «qoıma» qyzmetin atqarǵany anyqtalǵan. Medıtsınalyq kýálandyrý kezinde onyń esirtki qoldanǵany da belgili boldy.
Atalǵan fakti boıynsha qylmystyq is qozǵaldy. Qazir polıtsııa esirtkiniń zańsyz aınalymyna qatysy bar basqa da adamdardy anyqtap jatyr.
Eske salaıyq, munyń aldynda Astanada aıaq kıim qorabynan esirtki salynǵan oramalar tabylǵanyn jazǵan edik.
