Astanada esirtki ınternet-dúkenin uıymdastyrýshylardan 12 kelige jýyq esirtki tárkilendi
ASTANA. KAZINFORM - Іshki ister mınıstrligi esirtki satatyn ınternet-dúkenderdi joıý boıynsha tıimdi sharalar qabyldap jatyr. Elordada «Pepe» ınternet-dúkeni arqyly esirtki taratýmen aınalysqan 30 jastan asqan bes er adam ustaldy, dep habarlaıdy Polisia.kz.
Jedel-izdestirý is-sharalarynyń nátıjesinde polıtsııa Memlekettik kúzet qyzmetimen birlesip, jaldamaly páterlerde kúdiktilerdi bir mezgilde qolǵa túsirdi. Qylmystyq top «uıymdastyrýshy – býyp-túıýshi – qoımashy – esirtki jasyrýshy» ıerarhııasy boıynsha áreket etken.
Olar esirtki tutynýshylardy táýlik boıy marıhýana, gashısh, kannabıs shaıyry jáne kannabıs tobyna jatatyn basqa da esirtki zattarymen qamtamasyz etip otyrǵan.
– Usynylǵan assortımentte kannabıs shaıyry qosylǵan pecheneler de bolǵan. Salmaǵy 100 gramnan bolatyn osyndaı 238 dana erekshe kondıterlik ónim tárkilendi. Kúdiktilerdiń turǵylyqty jerlerin tintý kezinde jalpy salmaǵy 12 kelige jýyq túrli esirtki zattary, onyń ishinde 8 keliden astam marıhýana, 1,5 keli gashısh jáne 2 keli kannabıs shaıyry alyndy. Budan bólek, iri kólemdegi qolma-qol aqsha, bank kartalary, uıaly telefondar, elektrondy tarazylar, brıketter, vakýýmdaý jáne ólshep-oraý qurylǵylary, túrli tústi oqshaýlaǵysh taspalar men basqa da zattaı dálelder tárkilendi, – dedi ІІM Esirtki qylmysyna qarsy komıteti basqarmasynyń bastyǵy Baqytjan Ámirhanov.
Ustalǵandarǵa qatysty Qazaqstan Respýblıkasy Qylmystyq kodeksiniń 297-baby boıynsha sotqa deıingi tergep-tekserý bastaldy. Kúdiktiler qamaýǵa alyndy.
Baqytjan Ámirhanovtyń aıtýynsha, Іshki ister mınıstrligi esirtki bıznesin uıymdastyrýshylar men esirtki jetkizý arnalaryna qarsy baǵyttalǵan is-sharalardy jalǵastyrady.
Osyǵan deıin Jambyl oblysynan Almatyǵa 113 keli esirtki jetkizgen aǵaıyndy ustaldy.
