Astanada Esil jaǵalaýyndaǵy muz aıdyny ýaqytsha jabyldy
ASTANA. KAZINFORM — Astanada kúnniń kúrt jylynýyna baılanysty Esil jaǵalaýyndaǵy muz aıdyny men syrǵanaqtardyń jumysy ýaqytsha toqtatyldy. Bul týraly elorda ákimdiginiń baspasóz qyzmeti habarlady.
Astanada aýa raıynyń kúrt jylynýyna jáne qardyń erýine baılanysty Esil ózeniniń jaǵalaýynda ornalasqan muz aıdyny men syrǵanaqtardyń jumysy ýaqytsha toqtatyldy. Bul týraly elordalyq Tótenshe jaǵdaılar departamenti habarlap, qala turǵyndaryna eskertý jasady.
Astana qalasynyń Tótenshe jaǵdaılar departamentiniń málimetinshe, aýa raıynyń kúrt jylynýy saldarynan Esil ózenindegi muzdyń qalyńdyǵy juqarǵan. Qazirgi ýaqytta ózen arnasyndaǵy muzdyń qalyńdyǵy 22 santımetr, al keıbir ýchaskelerde (Ortalyq jaǵajaı aýmaǵynda) 35–37 santımetrge jetedi.
Osyǵan baılanysty jańa jyl merekeleri kezeńinde turǵyndar qaýipsizdik maqsatynda ózen ústimen júrmegen jón. Sondaı-aq Esil jaǵalaýyndaǵy muz aıdyny men syrǵanaqtardyń jumysy ýaqytsha toqtatyldy.
Muzdyń qalyńdyǵy Tótenshe jaǵdaılar departamenti belgilegen normatıvtik deńgeıge jetkennen keıin atalǵan nysandar qaıtadan paıdalanýǵa beriledi.
Aıta keteıik, qala turǵyndarynyń qaýipsiz júrýin qamtamasyz etý úshin joldarǵa, trotýarlar men kóshelerge táýlik boıy tehnıkalyq tuz sebilip jatyr.
— Astana qalasynyń ákimdigi qala turǵyndary men qonaqtaryn qaýipsizdik talaptaryn saqtaýǵa, joldar men trotýarlarda barynsha saq bolýǵa, sondaı-aq qolaısyz aýa raıy kezinde alys saparlarǵa shyqpaýǵa shaqyrady, — delingen habarlamada.
Aıta ketelik Astanada kóktaıǵaq saldarynan 100-den astam jol-kólik oqıǵasy bolǵan edi.