Astanada Esil ózeninde teplohodpen serýendeý qashan bastalady

ASTANA. KAZINFORM — Astanada jazǵy týrıstik maýsym qarsańynda ekskýrsııalyq teplohodtar daıyndalyp jatyr. Búgin Esil ózeni jaǵalaýynda kemeler sý betine túsirildi, dep habarlaıdy elorda ákimdiginiń resmı saıty.

Teplohodtar 1 mamyrdan bastap ózen boıymen qatynaı bastaıdy. 

Astana Tourism týrızmdi damytý ortalyǵy departamentiniń dırektory Saıat Oraztaıdyń aıtýynsha, Esil boıymen serýendeý — elordadaǵy eń tanymal týrıstik demalys túrleriniń biri.

«Esil Astana» keme qatynasy kompanııasynyń ókili Karına Danılko maýsym aldynda barlyq teplohod tolyq tehnıkalyq tekseristen ótkenin aıtty.

— Barlyq teplohod syrlanyp, tolyq qyzmet kórsetildi. Jolaýshylar qaýipsizdigine erekshe kóńil bólindi: jańa qutqarý jıletteri satyp alynyp, jabdyqtar tekserildi, — dedi ol.

Sýǵa 45 oryndyq «Astana KSW-082», 65 oryndyq «Esil KSW-092» jáne «R-118», 30 oryndyq «KS-192», «KS-201» jáne «PR-151» teplohodtary túsirildi.

Sonymen qatar «Esil Astana» kompanııasy keme parkin jańartý maqsatynda 12 adamǵa deıin arnalǵan jyldam júretin tórt shaǵyn keme satyp alǵan.

Budan buryn Astanada 200-ge jýyq adam Esil jaǵalaýyn tazartýǵa shyqqanyn habarlaǵanbyz.