Astanada eski úılerdi buzý jónindegi pılottyq joba aıasynda salynǵan úı paıdalanýǵa berildi
ASTANA. 15 qarasha. QazAqparat - Astanada apatty jaǵdaıda turǵan eski úılerdi buzýdyń pılottyq jobasy aıasynda jańa turǵyn úı kesheni paıdalanýǵa berildi, dep habarlaıdy elordanyń resmı saıtynan. Atalǵan nysan biregeı tájirıbe boıynsha salynǵan. Eski úılerdi buzýdyń pılottyq baǵdarlamasyna sáıkes, turǵyndarǵa tıimdi tetikter usynyldy. Úı ıesine páterde turatyn adamdardyń sanyna qaramastan buzylatyn úıdiń sharshy metrine teń páter beriledi. Aıta keteıik, bul úılerdiń naryqtyq baǵasy apattyq úılerdegi sharshy metrdiń qunymen sáıkes kelmeıdi.
Elorda ákimdiginiń ókilderi baspanaly bolǵandardy saltanatty jaǵdaıda quttyqtady.
«Burynǵy úıimizde esh jaǵdaı jasalmasa da, talaı jyl turyp keldik. Qazirgi zamanǵa saı abattandyrylǵan páter bergen qala bıligine alǵysymyzdy bildiremiz», - dedi jańa úıdiń turǵyndarynyń biri Jumabıke Ábıbýllınova.
«Pılottyq jobanyń biregeıligi - baǵdarlamanyń bıýdjetke tegin túsentindiginde. Memleket basshysynyń jeke tapsyrmasy boıynsha atalǵan joba «Qoljetimdi baspana» baǵdarlamasy aıasynda júzege asyrylady. Bir ereksheligi aqshanyń qaıtarylatyndyǵy bolyp otyr. Byltyr osyndaı negizinde ákimdikke 20 mlrd. teńge bólinse, keler jyly dy osynsha beriledi. Turǵyn úılerdiń 30% apatty jaǵdaıdaǵy eski úılerdiń turǵyndaryna tegin, al 70% shyǵyndardy óteý úshin kommertsııalyq baǵamen beriledi», - dedi Astana qalasy ákiminiń orynbasary Sergeı Horoshýn.
«Birinshi kezeńde 2018 jylǵa deıin 228 úı buzylmaq. Joba ústimizdegi jyly aqpan aıynda qolǵa alynǵan. Jyl sońyna deıin 4 turǵyn úı salynady. Jalpy alǵanda, 3,5 myńǵa jýyq páterdiń qurylysy júrgizilip jatyr», - dedi ol.
Jańa úıde barlyq qajetti jaǵdaılar jasalǵan jáne burynǵy apatty jaǵdaıdaǵy eski turǵyn úıge áldeqaıda jaqsy balama bolyp tabylady. Onyń ústine, atalǵan sanattaǵy úılerdi buzý bastamasy TJ oryn alý táýekeldiligin azaıtady, sebebi eski úılerdiń basym bóliginiń elektr qondyrǵylary, kommýnıkatsııalary tozǵan, qaıta qurýǵa jáne jóndeýge kelmeıdi, qabyrǵalary túsip, turǵyndardyń qaýipsizdigine jáne ómirine qaýip tóndiredi jáne t.b.
Qarasha aıynyń sońyna deıin apatty jaǵdaıdaǵy 11 úıdiń turǵyndaryna jańa baspana beriledi. Qazirgi ýaqytta Astanada 189 páterlik 2 turǵyn úı kesheniniń qurylysy aıaqtaldy. 25 qarashaǵa deıin apatty jaǵdaıdaǵy 11 úıdiń turǵyndary eki kezeńmen kóshiriledi. Birinshi kezeńde, 10-15 qarashada Tilendıev dańǵylynyń boıyndaǵy turǵyn úıge eski úılerden 85 otbasy kóshedi. Ekinshi kezeńde, 25 qarashaǵa deıin qalǵan páter ıeleri Saraıshyq kóshesinde qonys toıyn toılaıtyn bolady.
